“Төрийн орон сууцны корпораци” ТӨХХК болон албан хаагчдын нэрийг барьж, ТОСК-ийн байр бүтээж өгнө, орон сууцны бүртгэлд хамруулна гэх залилан эрчимжиж, олон хүн хохирогч болж байгаа тул энэ төрлийн залилах гэмт хэрэгт өртөхөөс сэрэмжлүүлж байна.
“Төрийн орон сууцны корпораци” ТӨХХК нь Хан-Уул дүүргийн 21 дүгээр хорооны нутаг дэвсгэрт хэрэгжүүлж буй “Солонго 1, 2” орлогод нийцсэн орон сууцны хороолол төсөл болон бусад төслүүд дээр ямар нэгэн урьдчилсан захиалга аваагүй болохыг албан ёсоор мэдэгджээ.
“Солонго 1, 2” төсөл нь 2027 он хүртэл хэрэгжинэ. Эхний ээлжийн 13 блок 980 айлын орон сууцыг 2025 оны 12 дугаар сард ашиглалтад оруулахаар төлөвлөж байгаа бөгөөд Засгийн газрын тогтоол гарсны дараа албан ёсоор захиалга авах юм. Тухайн үед энэ талаарх мэдээллийг байгууллагын цахим хуудас болон хэвлэл мэдээллийн хэрэгслээр олон нийтэд зарлах учир иргэдийг баталгаат эх сурвалжаас мэдээлэл авч, сонор сэрэмжтэй байж, залилах гэмт хэргийн хохирогч болохоос сэрэмжлэхийг сануулжээ.
Мөн төсөл хөтөлбөр, орон сууцтай холбоотой мэдээллээ www.tosk.gov.mn албан ёсны цахим хуудсаараа хүргэдэг бөгөөд илүү дэлгэрэнгүй мэдээлэл авах шаардлагатай бол 7288-7788 дугаарын утсаар холбогдох боломжтой талаар мэдээлсэн байна.
Байгууллагын нэр хүндэд халдаж, иргэдийг хохироож байгаа энэ төрлийн гэмт хэргийг хууль хяналтын байгууллагаар тухай бүрд нь шалгуулж байгаа аж.
Сэтгэгдэл (0)
Сэтгэгдэл бичигдээгүй байна