Монгол Улсын Засгийн газрын 2024–2028 оны үйл ажиллагааны хөтөлбөрт тусгагдсан “Батлан хамгаалах сэргэлт” бодлого болон “Эх оронч Монгол – Их сэргэлтийн жил”-ийн хүрээнд Зэвсэгт хүчний 014 дүгээр ангийн хугацаат цэргийн алба хаагчид В ангиллын жолооны сургалтад амжилттай хамрагджээ.
Сургалтыг Зэвсэгт хүчний 011 дүгээр ангийн Техникийн бага мэргэжилтэн бэлтгэх сургалтын төвийн багш нар нэг сарын хугацаанд зохион байгуулж, сургалтын чанар, үр дүнг бататгах зорилгоор замын хөдөлгөөний дүрмийн тестийн шалгалтыг зохион байгуулсан юм.
Шалгалтад Зэвсэгт хүчний 014 дүгээр ангийн байлдагч Б.Өнөболд замын хөдөлгөөний дүрмийн тестэд 20 асуултыг 28 секундэд, дэд түрүүч М.Саруул 29 секундэд алдаагүйгээр 100 хувь бөглөж, тус төвийн өмнөх 32 секундийн рекордыг шинэчилж, замын хөдөлгөөний дүрмийн тестийн шалгалтад шинэ амжилт тогтоожээ.
Энэхүү амжилт нь хугацаат цэргийн алба хаагчдын суралцах хүсэл эрмэлзэл, мэргэжлийн ур чадварын ахиц, цаашлаад Зэвсэгт хүчний боловсон хүчний чадавхыг бэхжүүлэхэд чиглэсэн үйл ажиллагааны үр дүнг илтгэж байгаа юм.
Эх сурвалж: Зэвсэгт хүчний жанжин штаб
Сэтгэгдэл (0)
Сэтгэгдэл бичигдээгүй байна