Эх орныхоо баруун, зүүн, өмнөд, хойд хязгаарт орших Соёмбот баганыг Монгол Улсын төв цэгтэй холбосон 5000 км замыг туулахаар гүйж буй Зэвсэгт хүчний 123 дугаар ангийн хөгжимчин, цэрэгжлийн спортын мастер, ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч, спортын мастер дэд ахлагч Б.Буянхишиг нар 1000 дахь км-ээ өнөөдөр /2025.04.24/ амжилттай туулжээ.
Баруун хязгаараас гараагаа эхлүүлсэн ахлагч нар Баян-Өлгий, Ховд, Говь-Алтай аймгийн нутаг дэвсгэрийг туулж, дөрөв дэх аймагтаа буюу Баянхонгорын Бууцагаан суманд 1000 дахь км замаа туулсан байна.
Гүйгчид өнөөдөр 1000 км зам туулсан онцгой үйл явдлаас гадна дэд ахлагч Б.Буянхишиг Монгол Улсын хэт холын зайн гүйлтийн эмэгтэй тамирчны амжилтыг шинэчлэн тогтоож байна.
Өмнө нь Хил хамгаалах байгууллагын алба хаагч ахлах ахлагч Т.Рэнцэнбадам 2021 онд 1047 км замыг 48 хоногт рекорд тогтоосон байжээ. Дэд ахлагч Б.Буянхишиг өнөөдөр /2025.04.24/ үдээс хойших гүйлтээрээ 1050 км зайдаа хүрч, энэхүү амжилтыг шинэчлэн тогтоох төлөвтэй байгаа юм. Тэрбээр өмнөх рекорд буюу 48 хоногийг зөвхөн өнөөдрийн байдлаар гэхэд хоёр дахин багасаж буюу 23 хоног болгон бууруулсан амжилт үзүүлж байна.
Э.Даваажамц, Б.Буянхишиг нар болон "Таван цэг" багийнхныг явсан газар бүрт нь аймгийн удирдлагууд, цэргийн штабынхан, төрийн цэргийн болон хууль сахиулах байгууллагын удирдлага хамт олон, гүйлтийн спортыг сонирхогч хүүхэд залуус, тээвэрчид, малчид бүгд найрсаг сайхан сэтгэлээр угтан авч байгаа аж.
Сэтгэгдэл (0)
Сэтгэгдэл бичигдээгүй байна