Монгол цэргийн нэгдсэн холбооноос санаачлан төрийн цэргийн байгууллагуудын хугацаат цэргийн алба хаагчдын бие бялдар, мэдлэг, ур чадварыг сорих “Шилдэг дайчин-2025” болзолт уралдааныг зарлаж, өчигдөр /2025.04.15/ нээлтийн ажиллагаагаа хийжээ.
Энэхүү болзолт уралдаан нь төрийн цэргийн байгууллагын хугацаат цэргийн алба хаагчдын бие бялдрын бэлтгэлжилт, мэдлэг боловсролыг дээшлүүлэх, манлайлал бий болгох, хугацаат цэргийн албыг олон нийтэд сурталчлах, хүүхэд залуучуудад цэрэг-эх оронч үзлийг төлөвшүүлэх, иргэний нийгмийн оролцоог дэмжиж, зөв хандлагатай, өв тэгш эрүүл монгол эр хүнийг төлөвшүүлэх зорилгоор Зэвсэгт хүчин, Хил хамгаалах байгууллага, Дотоодын цэргийн байгууллагад алба хааж байгаа хугацаат цэргийн албаны түрүүч, байлдагчдын дунд 4 дүгээр сарын 15-ны өдрөөс 9 дүгээр сарын 20-ны өдрүүдэд явагдах юм.
Уралдаан нь хугацаат цэргийн алба хаагчдын бие бялдрын бэлтгэлжилтийн түвшинг бие бялдрын ерөнхий хөгжил, бие бялдрын бэлтгэлийн түвшингийн үзүүлэлтийн сорил авч дүгнэх, ур чадварын түвшинг монгол бичиг, англи хэл, эссэ бичлэгийн чадвараар сорино. Үүний сацуу хугацаат цэргийн алба хаагч хариуцсан салааны захирагч нарын дунд бие бялдар, мэдлэг чадварыг салааны бүрэлдэхүүний шат бүрийн төгсгөлд авсан онооны дунджаар шилдэг салааны захирагчийг гурван үе шаттайгаар шалгаруулна. Эхний үеийг нэгтгэл, анги, салбарууд дотоодоо, II үеийг төрийн цэргийн байгууллагууд харьяа нэгтгэл анги, салбарынхаа хэмжээнд, III үеийг ажлын хэсэг төрийн цэргийн байгууллагуудын хэмжээнд явуулж тодруулах юм.
Болзолт уралдааны нээлтийн ёслолын ажиллагаанд Зэвсэгт хүчний жанжин штабын орлогч дарга бригадын генерал Б.Баатар, Монгол Улсын Ерөнхийлөгчийн зөвлөх, Монгол Цэргийн нэгдсэн холбооны ерөнхий нарийн бичгийн дарга, шинжлэх ухааны гавьяат зүтгэлтэн, доктор, профессор, бэлтгэл дэслэгч генерал Ц.Тогоо болон төрийн цэргийн байгууллагуудын удирдлага, Зэвсэгт хүчний нэгтгэл, ангиудын захирагч нар, хугацаат цэргийн алба хаагчдын төлөөлөл оролцжээ.
Зэвсэгт хүчний жанжин штабын орлогч дарга, бригадын генерал Б.Баатар нээлтийн ажиллагааны үеэр "Монгол Улсын Ерөнхийлөгч Ухнаагийн Хүрэлсүх улс үндэстнийхээ аюулгүй байдлын төлөө, монгол гэр бүлийн сайн сайхан амьдралын төлөө “Эрүүл монгол хүн” үндэсний хөдөлгөөн өрнүүлж, аливаа хорт зуршлаас ангид байж, эрүүл зөв амьдралыг төлөвшүүлж, эх орон, гэр бүл, хань ижилдээ үнэ цэнтэй эрхэм хүн нь байж, их зүйлийг бүтээж, нэр төртэй амьдрахыг уриалсан билээ. Энэхүү уриалгын хүрээнд төрийн цэргийн байгууллагуудын хугацаат цэргийн алба хаагчдын бие бялдар, мэдлэг, ур чадварыг хөгжүүлэхээр олон арга хэмжээг авч хэрэгжүүлж байгаагийн нэг нь манлайллыг хөгжүүлэх практик хэрэгцээ, шаардлагуудыг шийдвэрлэх арга замыг тодорхойлох ажлын хүрээнд зохион байгуулагдах “Шилдэг дайчин-2025” болзолт уралдаан юм. Уралдааны үр дүн, түүнээс гарсан санал, санаачилга, хамтын оновчтой шийдэл, зөвлөмж нь хугацаат цэргийн алба хаагчдыг хөгжүүлэх, ур чадварыг нэмэгдүүлэх арга замыг тодорхойлсон бодлого, эрх зүйн баримт бичгүүдэд өөрчлөлт оруулах, шинэчлэн боловсруулах үндсийг бүрдүүлэх зэрэг чухал ач холбогдолтой" гэдгийг онцолсон юм.
Мөн Монгол Цэргийн нэгдсэн холбооны ерөнхий нарийн бичгийн дарга Ц.Тогоо энэхүү болзолт уралдаан нь төрийн цэргийн байгууллагын хугацаат цэргийн алба хаагчид алба хааж буй хугацаандаа мэдлэг чадвар, бие бялдраа хөгжүүлж, цэргийн албанаас бие бялдрын өв тэгш хөгжилтэй болж халагдаж, аймаг, сум орон нутагтаа ханхар сайхан залуучууд болж очиж, нийгэм, соёлын ажилд манлайлан оролцдог байх хөгжил энэ үеийн цэргийн насны залуус, ирээдүйд өрх гэрээ авч явах залууст хэрэгтэй байгааг онцолж, энэхүү болзолт уралдаанаар дамжуулж тодорхой үр дүнд хүрэхийг тус холбооноос дэвшүүлсэн зорилт юм гэсэн байна.
Сэтгэгдэл (0)
Сэтгэгдэл бичигдээгүй байна