Улсын чанартай авто зам дагуу 100 км тутам, нийт 58 байршилд "Авто зам дагуу үйлчилгээний цогцолбор"-ыг төр, хувийн хэвшлийн хүрээнд байгуулах бөгөөд одоогийн байдлаар 18 байршилд үйл ажиллагаа явуулж байна.
Жуулчны улирал эхэлж байгаатай холбогдуулан Соёл, спорт, аялал жуулчлал, залуучуудын сайд Ч.Номин зам дагуух түр буудаллах цэгүүдэд ажиллаж, нөхцөл байдал, тулгамдаж буй асуудалтай газар дээр нь танилцжээ.
Эдгээр үйлчилгээний цогцолборууд нь ариун цэврийн байгууламж, хоол хүнсний үйлчилгээ, дэлгүүр, худалдаа, байршуулах хэрэгсэл зэрэг 10 гаруй төрлийн стандартын шаардлага хангасан үйлчилгээг 24 цагийн турш үзүүлж, зорчигчид ая тухтай, аюулгүй аялах нөхцөлийг хангаж, мөн орон нутагтаа 80-150 гаруй ажлын байрыг бий болгож байна.
Цаашид үйл ажиллагаагаа тогтвортой эрхлэх, өргөжүүлэх, үйлчилгээндээ байгальд ээлтэй ногоон технологийг нэвтрүүлэхэд хөнгөлөлттэй зээл, санхүүгийн дэмжлэг хэрэгтэй байгааг үйлчилгээ эрхлэгчид дурдсан аж.
Засгийн газраас 2025 онд аялал жуулчлалын салбарт 200 гаруй тэрбум төгрөгийн хөнгөлөлттэй зээл олгох бөгөөд энэхүү зээлд зам дагуу үйлчилгээний цогцолборуудыг хамруулна. Ингэснээр 2030 он гэхэд авто зам дагуу үйлчилгээний цогцолбор 100 хувь ашиглалтад орох юм.
Сэтгэгдэл (0)
Сэтгэгдэл бичигдээгүй байна