Монгол Улсын Их сургуулийн Зүүн бүсийн сургууль, Дорнод аймаг дахь Политехникийн коллежийн оюутнууд “Оюутан цэрэг” цэргийн ерөнхий бэлтгэл шатны сургалтад хамрагджээ.
Тус сургалтын нээлтийн үйл ажиллагаанд Дорнод аймгийн Засаг даргын тамгын газрын Цэргийн штабын дарга, хурандаа О.Ганзориг, Зэвсэгт хүчний 327 дугаар ангийн захирагч хурандаа Д.Бямба, Монгол Улсын их сургуулийн Зүүн бүсийн сургуулийн захирал Б.Мядагмаа, Дорнод аймаг дахь Политехникийн коллежийн захирал Л.Хишигтогтох нарын албаны төлөөллүүд болон оюутан цэрэгт элссэн оюутнуудын эцэг эх, гэр бүлийнхэн нь оролцож Монгол Улсын үндсэн хуульд заасан үүргээ амжилттай нэр төртэйгөөр хаахыг оюутан цэргүүддээ хүссэн байна.
Аймгийн Засаг даргын тамгын газрын Цэргийн штабын дарга, хурандаа О.Ганзориг тус арга хэмжээг нээж үг хэлэхдээ цэргийн алба бол нэг биед заяах жирийн алба биш. Ажил амьдралаа аваад явах тэсвэр тэвчээр, хатуужил, эх орон, ард түмнээ хайрлаж дээдлэх итгэл үнэмшил, ёс зүйг төлөвшүүлж өгдөг эрхэм үүрэг хариуцлага гэдгийг цохон тэмдэглэжээ.
Оюутан цэрэгт хамрагдсан эдгээр залуус 2025 оны 4 дүгээр сарын 12-ны өдрөөс 6 дугаар сарын 12-ны өдөр хүртэл бямба, ням гаргуудад Дорнод аймаг дахь Политехникийн коллежийн “Оюутан цэрэг” сургалтын танхимд “Цэргийн ерөнхий бэлтгэл” шатны сургалтад хамрагдах юм.
Сэтгэгдэл (0)
Сэтгэгдэл бичигдээгүй байна