Алтай таван богдын Сонгинотын даваагаас хэт холын зайн гүйлтээ эхлүүлсэн “5 цэг” багийн тамирчид болох Зэвсэгт хүчний 123 дугаар ангийн хөгжимчин, цэрэгжлийн спортын мастер, ахлах ахлагч Э.Даваажамц, Зэвсэгт хүчний 234 дүгээр ангийн гүүрчин аврагч, спортын мастер, дэд ахлагч Б.Буянхишиг нар 350 км замыг туулж, өчигдөр /2025.04.10/ Ховд хотод хүрэлцэн очжээ.
Тамирчдыг Зэвсэгт хүчний Жанжин штабын БСТГ-ын дарга, бригадын генерал С.Ванчинхүү, Ховд аймгийн Засаг даргын Тамгын газрын даргын албан үүргийг түр орлон гүйцэтгэгч Х.Баасанхүү, аймгийн ЗДТГ-ын Цэргийн штабын дарга, хурандаа Б.Ганхуяг, Зэвсэгт хүчний 123 дугаар ангийн захирагч, хурандаа Х.Энхболд нарын удирдлага, төрийн цэргийн болон хууль сахиулах байгууллагын бүрэлдэхүүн, ард иргэдийн төлөөлөл, хүүхэд залуучууд төв талбайд угтан авч амжилт хүссэн байна.
Э.Даваажамц, Б.Буянхишиг нар эх орныхоо дөрвөн зүгийн хязгаарт орших Соёмбот баганыг Монгол Улсынхаа төв цэгтэй холбосон 5000 км замыг нийт 99 хоногт туулахаар төлөвлөж байгаа юм. Тодруулбал, баруун захын цэг Алтай таван Богдоос зүүн захын цэг Дорнод аймагт байрлах Соёлз уулын Модот хамар хүртэл 11 аймгийн 40 сумын нутаг дэвсгэрээр 3280 км замыг 63 хоногт, хойд захын цэг Хөвсгөл аймагт байрлах Монгол шарын даваанаас өмнөд захын цэг Өмнөговь аймгийн Орвог гашууны Бор толгой хүртэл таван аймгийн 23 сумын нутаг дэвсгэрээр 1720 км замыг 36 хоногт тус тус туулахаар тооцжээ.
Сэтгэгдэл (1)