Эх орныхоо дөрвөн зүгийн хязгаарт орших Соёмбот баганыг Монгол Улсын төв цэгтэй холбосон 5000 км замыг туулж, түүхэн амжилт тогтоохоор гараанаас гарсан ахлах ахлагч Э.Даваажамц, дэд ахлагч Б.Буянхишиг нар буюу өчигдрийн байдлаар найм дахь өдрөө амжилттай гүйгээд байна.
Тэд өнгөрсөн долоо хоногийн лхагва гаригт Алтай Таван богдын Сонгинотын даваанаас гараагаа эхлүүлж, замдаа үзэсгэлэнт Толбо нуур, Цамбагарав хайрхны өврөөр сүлжин гүйсээр найм хоногт 330 км замыг туулжээ.
Ахлах ахлагч Э.Даваажамц, дэд ахлагч Б.Буянхишиг нар гүйлтийнхээ хуваарийн дагуу өнөөдөр /2025.04.10/ өглөө Ховд хот орох бөгөөд Ховдчууд нутгийн хүүгээ төв талбайдаа ёслол төгөлдөр угтан авах тухай мэдээлэл байна.
Ховдчууд 2021 онд ахлах ахлагч Э.Даваажамцыг эх орныхоо баруун хязгаараас зүүн хязгаар хүртэл гүйхэд нь алга ташин баяр хүргэж, тэр хэмжээгээр бахдаж байснаа дахин илэрхийлэх гэнэ.
Хамгийн олзуурхууштай нь гүйгчдийг хээр талд болон авто зам дагаад гүйж явахад нь Баян-Өлгий, Ховд аймгийнхан халуун савтай цай, үндэсний зоогоо тэврээд ирэх нь олон байна. “Цэргийн хүнээс гарах тэвчээр хатуужлыг харуулж явааг нь алсаас хараад тогтож сууж чадалгүй хүрээд ирлээ. Гүйж явааг нь алсаас хараад ямар их хайр хүрэв ээ” хэмээн бэлтгэл дэд хурандаа Н.Тилек машинтайгаа давхиад ирсэн бол Ховд аймгийн Мянгад сумын иргэн Б.Даваахишиг гүйгчдийг хээр талд хоноглохоор майхнаа босгож байхыг нь хараад “Миний хүүхдүүд манайд хоноод яв” хэмээн морьтойгоо шогшиж иржээ.
Гүйгчид ийнхүү зам дагуу таарсан тусч зөөлөн түмэн олон, арын албыг дааж яваа бүлгийнхнийхээ дэмжлэгээр 330 км замыг 8 хоногийн хугацаанд ажрахгүй туулаад байгаа талаар Зэвсэгт хүчний жанжин штабын цахим хуудаст ахмад Д.Болор мэдээлжээ.
Сэтгэгдэл (0)
Сэтгэгдэл бичигдээгүй байна