Э.ДАВААЖАМЦ, Б.БУЯНХИШИГ НАРЫГ БАЯН-ӨЛГИЙ АЙМГИЙНХАН ТӨВ ТАЛБАЙДАА УГТАН ХҮНДЭТГЭЛ ҮЗҮҮЛЖЭЭ

Эх орныхоо баруун хязгаар Алтай таван богдын Сонгинотын даваагаас гүйлтийн гараагаа эхлүүлсэн ахлах ахлагч Э.Даваажамц, дэд ахлагч Б.Буянхишиг нар гурав дахь өдрөө гүйж, Баян-Өлгий аймгийн Өлгий хотод хүрэлцэн очиход төв талбайд Баян-Өлгий аймгийн Засаг дарга Е.Зангар, төрийн цэргийн болон хууль сахиулах байгууллагын удирдлага, хамт олон, Зэвсэгт хүчний 331, 340 дүгээр ангийн бие бүрэлдэхүүн, иргэд олон нийт угтан авч, хүндэтгэл үзүүлжээ.

Гүйгчид гурван хоногийн хугацаанд нийт 124 км замыг туулаад байгаа бөгөөд 4 дүгээр сарын 4-ний энэ өдөр Зэвсэгт хүчний 325 дугаар ангийн 116 дугаар салбарын хоёр алба хаагч Улаанхус сумаас Өлгий хот хүртэлх 43 км замыг хамтдаа туулж хамт олноороо дэмжиж буйг энэхүү үйлдлээрээ илэрхийлсэн байна. 

Баян-Өлгий аймгийн Засаг дарга Е.Зангар эх орныхоо дөрвөн зүгийн хязгаарт орших Соёмбот баганыг Монгол Улсынхаа төв цэгтэй холбосон 5000 км замыг туулах гараагаа Өлгий нутгаас эхлүүлж буйд талархал дэвшүүлж, монгол цэргийн тэсвэр хатуужил, эр зоригыг нотлон харуулж буйгаар нь бахархаж байна гэсэн юм.

Гүйгчдэд дэмжлэг үзүүлэх бүлгийнхэн бүх талаар дэмжиж буй Баян-Өлгий аймгийн удирдлага, хурандаа Ц.Буянтогтох даргатай Цэргийн штабынхан, хурандаа Ш.Уртнасан захирагчтай Зэвсэгт хүчний 340 дүгээр анги, хурандаа Х.Золжаргал захирагчтай Зэвсэгт хүчний 331 дүгээр анги, ахмад Г.Хосбаяр захирагчтай Зэвсэгт хүчний 116 дугаар салбар болон эрхэм хилчид, Улаанхус сумын удирдлага, "Согоо" багийн дунд сургуулийн хамт олны сайхан сэтгэлд талархаж буйгаа илэрхийлжээ.