Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Л.Нямгэрэл Олон улсын эрх зүйн хөгжлийн байгууллагын Монгол дахь Суурин төлөөлөгч ноён Чарльз Болланд тэргүүтэй төлөөлөгчдийг өчигдөр (2025.03.25) хүлээн авч уулзлаа.
Олон улсын эрх зүйн хөгжлийн байгууллага нь Канад Улсын Засгийн газрын санхүүжилтээр “Монгол Улсад жендэрт суурилсан хүчирхийлэлтэй тэмцэх үйл ажиллагааг бэхжүүлэх төсөл”-ийг 2019-2023 оны хооронд амжилттай хэрэгжүүлсэн юм.
Тус төслийн хоёрдугаар шатны үйл ажиллагаа эхэлж байгаатай холбогдуулан талууд Монгол Улсад гэр бүлийн хүчирхийлэлтэй тэмцэх тогтолцоог бэхжүүлэхэд салбар хоорондын хамтын ажиллагааг эрчимжүүлэх, хууль сахиулах, шүүх эрх мэдэл болон хариу үйлчилгээ үзүүлэгчийн мэргэжлийн ур чадварыг нэмэгдүүлэх, хохирогч төвтэй хандлагыг төлөвшүүлэх зэрэг олон талт арга хэмжээг ирэх 5 жилийн хугацаанд хэрэгжүүлэх төлөвлөгөөний талаар санал солилцжээ.
Уулзалтад тус Ажлын албаны Гэмт хэргээс урьдчилан сэргийлэх ажлыг зохицуулах хэлтсийн дарга Б.Одмандах, Олон улсын эрх зүйн хөгжлийн байгууллагын Хөтөлбөрийн менежер Н.Одонтуяа, төслийн зохицуулагч С.Агьзул, төслийн мэргэжилтэн Б.Ундрахбуян нар оролцсон байна.
Сэтгэгдэл (0)
Сэтгэгдэл бичигдээгүй байна