“Сүүлчийн тоглолт эсэхийг хэлж мэдэхгүй байна. Яагаад гэвэл яг шийдчихсэн юм алга” хэмээн Рубен Аморим өчигдөр Португалын цомд “Насьонал де Мадэйра”-г 3:1-ээр хожсон тоглолтын өмнө сэтгүүлчдэд хэлсэн байна. Энэ нь “Спортинг”-ийг орхиж, “Манчестер Юнайтед”-д очих эсэх тухай асуултын хариулт юм.
Гэвч үүний дараахан “Спортинг” албан ёсны мэдэгдэл гаргаж, Рубен Аморим ажлаа өгч буйг зарлалаа. Харин “Манчестер Юнайтед”-ын зүгээс одоогоор албан ёсны мэдэгдэл хийгээгүй байна.
Рубен Аморим одоо 39 настай, залуухан дасгалжуулагч. Португалын Лиссабонд төрж өссөн. Хөлбөмбөгчийн замналаа “Белененсеш”-т эхлүүлж, дараа нь “Бэнфика”-д 6 жилийг өнгөрүүлсэн. Төвийн хагас хамгаалагч, баруун хамгаалагч, жигүүрийн хагас хамгаалагч гээд олон байрлалд тоглож чаддаг хөлбөмбөгч байсан. Португалын шигшээд багтан 2010 болон 2014 оны ДАШТ-д оролцсон.
“Бэнфика”-д байх үед дасгалжуулагч Жорже Жезушийн гарааны сонголтыг шүүмжилсний улмаас нэгдүгээр багаас хасагдаж, хоёрдугаар багтай бэлтгэл хийх шийтгэл хүлээсэн. Гэвч хоёрдугаар багтай бэлтгэл хийхгүй гэж “гүрийсэн” тул тэр улиралдаа “Брага” руу зээллэгээр явуулж байсан юм билээ. Зээллэгээс буцаж ирээд “Бэнфика”-тай требл хийсэн.
Гэвч өвдөгний чагтган холбоос тасарсны улмаас 32 настайдаа хөлбөмбөгчийн замналаа өндөрлүүлжээ. Үүнийхээ дараагаар дасгалжуулагчийн ажилд шимтэж, гуравдугаар дивизионы "Каза Пиа" багт ажиллаад тэндээсээ “Брага”-д очсон байдаг. “Брага”-д очихдоо дасгалжуулагчийн үнэмлэхгүй байсан тул тоглолтын үеэр шууд зааварчилгаа өгөх эрхгүй байлаа. “Брага”-д очмогцоо Португалын цомд түрүүлсэн. 2020 онд түүнийг “Спортинг” 10 сая евро төлж “Брага”-гаас авсанаар Хөлбөмбөгийн түүхэнд хамгийн өндөр үнэ хүрсэн дасгалжуулагчдын гуравт жагссан байна.
“Спортинг”-т дөрвөн жил гаруй ажиллахдаа цомд хоёр удаа түрүүлснээс гадна лигтээ мөн хоёр түрүүлсэн, Супер цом гардсан. 19 жилийн хугацаанд аваргын цомд гар хүрээгүй байсан “Спортинг”-ийг эргэн амжилтын замд гаргаж, фанатуудыг нь их баярлуулсан. Ялангуяа лигийнхээ 34 тоглолтын 29-д нь хожиж, аман хүзүүнд орсон “Бэнфика”-гаас 10 оноогоор тасарч түрүүлсэн нь фанатуудыг огшоож, хөлбөмбөгийн мэргэжилтнүүдийн анхаарлыг гойд татсан юм.
Рубен Аморим англи хэлээр чөлөөтэй ярьдаг. Өөрийн байр суурин дээр бат зогсдог, хүчтэй сэтгэлзүйтэй хувь хүнд тооцогддог юм байна. Харилцааны хувьд их энгийн чөлөөтэй. Хөлбөмбөгийн тактикийн мэдлэг сайтай гэж үнэлэгддэг ажээ.
Үнэлэгдэхийн тухайд бол түүнийг “Барселона”, “Ливерпүүл”, “Ювентус”, “Байерн Мюнхен” зэрэг клубүүд сонирхож байсан. “Ливерпүүл”-ийн ажлын ярилцлагад хүртэл орсон гэсэн мэдээлэл бий. Гэхдээ 3-4-3 гэсэн загвараар тоглохыг эрхэмлэдгээс нь “Ливерпүүл” болгоомжилсон гэдэг юм билээ. Английн Премьер лигт гурван төвийн хамгаалагчтай энэ загвар тохирох эсэх нь эргэлзээтэй гэж үзсэн хэрэг. “Вест Хэм”-тэй мөн ярилцлагад орсон. Гэвч өөрөө дараа нь татгалзсан юм билээ. Энэ ярилцлагад орчихоод ирэхдээ “Би алдаа гаргажээ” гэж хэлсэн байдаг. Энэ нь тэнд очиж уулзах хэрэггүй байж гэсэн утгатай байлаа.
Рубен Аморимыг “Манчестер Сити”-гийн ирээдүйн дасгалжуулагч байх магадлалтай гэх яриа сүүлийн үед газар авсан. Учир нь Чики Бегиристайн энэ улирлыг дуусгаад “Сити”-гийн спортын албаны захирлын ажлаа өгч байгаа. Түүний оронд “Спортинг”-ийн Уго Виана ирэх нь тодорхой болсон. Уго Виана ирэхдээ Рубен Аморимтой хамт ирэх магадлал өндөр гэж байсан юм.
Рубен Аморимын удирдлага дор саяхан “Юнайтед”-ын авсан уругвай хагас хамгаалагч Мануэль Угартэ тоглож байсан. Хэдийгээр хамтдаа ажиллаж үзээгүй ч гэлээ Бруно Фернандеш цагтаа “Спортинг”-ийн ахлагч байснаараа энэ хоёр бас бага зэргийн холбоотой гэж ойлгож болно.
3-4-3 гэсэн загварын тухайд илүү тодруулж ярих юм бол гурван төвийн хамгаалагч+хоёр хамгаалах чиглэлийн хагас хамгаалагч+довтолгоонд идэвхтэй оролцдог хоёр захын хамгаалагч, хоёр довтлох чиглэлийн хагас хамгаалагч +нэг довтлогчтой гэсэн үг. Гэхдээ “Спортинг” өөрөө Португалынхаа лигийн түүхэн хамгийн хүчтэй гурван клубын нэг тул ингэж тоглох боломжтой байдаг. Харин өрсөлдөөн их ширүүн лигт энэ загвар тохирох эсэх нь эргэлзээтэй, их эрсдэлтэй. Тиймээс ч “Ливерпүүл” татгалзсан гэж байгаа.
Ийм л ирээдүйтэй гэгдэж буй, эхний амжилтууддаа хүрчихсэн залуу дасгалжуулагч “Манчестер Юнайтед”-д ирэх эсэх талаар яриа хүчээ аваад байна.
Р.ГЭГЭЭ
Сэтгэгдэл (0)
Сэтгэгдэл бичигдээгүй байна