Парисын зуны олимпын наадмын чөлөөт бөхийн эмэгтэйчүүдийн 50 кг-ын жинд Энэтхэгийн Винеш Погат финалд шалгарсан ч дэвжээнээ гарах эрхгүй болсон байна.
Учир нь финалын барилдаан болох өдрийн өглөө түүний жин 50 кг-аас 100 грамм гаруйхан илүү байжээ. Тиймээс жиндээ багтаагүй гэсэн үндэслэлээр хассан байна.
Өчигдөр орой Погатын жин 52 кг буюу байх ёстой жингээсээ 2 кг илүү байж. Өглөө жингээ үзүүлэх хүртэл илүү жингээ хасахыг хичээсэн ч 100 грамм дээр очоод "гацжээ".
Винеш Погат жингийнхээ босоо аварга Японы Юүи Сусакиг ялсан ч ийнхүү харамсалтайгаар хасагдаж байна.
Чөлөөт бөхийн нэг жинд амжилттай барилдсан бөхчүүд хоёр хоног дараалан барилдаж байгаа. Тэр хоёр хоногтоо хоёуланд нь жингээ үзүүлж, жиндээ байх ёстой юм.
Ийнхүү Погат хасагдсанаар түүнд шөвгийн дөрөвт ялагдсан Кубын бөх Гузман Лопес АНУ-ын Сара Хильдэбрандттай олимпын алтан медалийн төлөө барилдахаар болсон байна.
Сэтгэгдэл (0)
Сэтгэгдэл бичигдээгүй байна