КРИСТА ДЕГУЧИ: БИ АНХНЫХ НЬ ЮМУУ? МЭДЭЭГҮЙ ШҮҮ...

Парисын зуны олимпын наадмын жүдо бөхийн эмэгтэйчүүдийн 57 кг-ын жинд Канадын 28 настай, 160 сантиметр өндөр Криста Дегучи түрүүлж, түүхэн амжилт тогтоолоо.

Тэрбээр аваргын алтан медалийн төлөөх барилдаанд япон гаралтай Өмнөд Солонгосын тамирчин Хух Мимиг торгуулиар ялж, Олимпын аваргын алдрыг хүртлээ. Гэвч тэрбээр түрүүлсэн агшиндаа юу болж буйг ойлгоогүйгээ ярьсан байна.

“Яг тэр агшинд надад ялалт өгч буйг ойлгоогүй. Энэ чинь Канадын эмэгтэй жүдочдын анхны алтан медаль билүү тэ?” хэмээн сэтгүүлчээс асуужээ. Зөвхөн эмэгтэйчүүдийн ч биш эрэгтэй тамирчдын хувьд ч анхны алтан медаль гэдгийг сонсоод нүд нь томорч, “Хөөх тийм үү? Би анхных нь юм уу? Мэдээгүй шүү. Надаас өмнө нэг залуу байсан гэж бодож байлаа. Үгүй юм уу? ” хэмээн лавлан асуусан байна.

Дегучи Олимпын алтан медаль хүртэхээсээ өмнө Дэлхийн аваргаас хоёр алт, нэг мөнгө, нэг хүрэл медаль хүртсэн байлаа. Энэ оны ДАШТ-ий финалд Хух Мимитэй тулаад ялагдсаныхаа даагыг нэхэж аварга болж чадсан тухайгаа ярихдаа “Тийм ээ, миний хувьд хариугаа авсан ялалт байлаа. Сэтгэл санаа ч сайхан боллоо. Уг нь би мэх хийж, үнэлгээ авч ялахыг хүссэн юм. Гэвч торгуулиар ч гэсэн ялсан бол ялсан шүү дээ. Би жаргалтай байна” гэжээ.

Өмнөд Солонгосын жүдочтой алтан медалийн төлөө барилдахын өмнө шөвгийн дөрөвт олимпыг зохион явуулагч Францын бяртай тамирчин бүсгүй Сара-Леони Сисиктэй тулахдаа баруун өвдөг нь гэмтжээ. Гэвч Сара-Леониг мөн торгуулиар ялж чадсан юм. “Тэр барилдаан надад маш хэцүү байсан. Аз дайрч л яллаа” хэмээжээ.

Өнгөрсөн тавдугаар сард болсон ДАШТ-ээс мөнгөн медаль хүртэж байж Дегучи Олимпын эрхээ авсан. Канадаас түүний жинд Олимпын эрхийн төлөө ана мана өрсөлдсөн Жессика Климкайт тухайн ДАШТ-ээс хүрэл медаль хүртсэнээр Дегучид боломж олдсон юм. Гурван жилийн өмнө Климкайт Токиогийн олимпын наадамд оролцож, хүрэл медаль хүртсэн бөгөөд Дегучи эрхээ авч чадалгүй гэртээ үлдэж байлаа.

“Олимпын аварга болсондоо итгэж чадахгүй л байна. Парист иртлээ би урт замыг тууллаа. Цар тахлын дараагаар байдал их өөрчлөгдөж, надад их хүнд туссан. Токиогийн олимпод оролцоно гэж итгэж байсан болохоор маш их гунигласан. Токиогоос хойш бүтэн гурван жилийг хүлээнэ гэдэг миний хувьд дэндүү урт санагдлаа” хэмээн Дегучи өгүүлсэн байна.

Дегучи бол канад аавтай, япон ээжтэй. Түүний дүү Келли Дегучи мөн жүдоч. Мөн л Парисын олимпын наадамд барилдаж, ням гаригт эхний шатанд Японы алдарт аварга Абэ Утад ялагдсан.

Криста Дегучи Японы шигшээд бэлтгэл хийж байсан ч 2017 оноос аавынхаа гарлыг дагаж Канадын нэрийн өмнөөс барилдах болсон юм. “Агч модны орон Олимпын хамгийн өндөр шагналын тавцанд гарах болсноор бахархаж байна. Канадын төрийн далбааг Парисын тэнгэрт мандуулж буйдаа баяртай байна” хэмээн Дегучи өгүүлжээ.