Парисын зуны олимпын наадмын талбайн теннисний эрэгтэйчүүдийн ганцаарчилсан төрлийн хоёрдугаар шатанд домогт Рафаэль Надаль – Новак Жокович нар халз тулахаар боллоо.
Олимпын сугалааны дараагаас л тэднийг хоёрдугаар шатанд халз таарах магадлалын тухай яриа гарсан. Гэвч Рафаэль Надаль ганцаарчилсан төрлөөс татгалзаж ч магадгүй байдал бий болсноор гоё тоглолт үзэхгүй өнгөрөхвий гэж спорт сонирхогчид сэтгэл түгшиж эхэлсэн.
Рафаэль Надаль эрэгтэй хосын төрөлд элэг нэгт Карлос Алькарасын хамт Аргентины Максимо Гонсалес, Андрес Мольтени нартай тоглоод хожсон. Тэгээд хэдхэн цагийн дараагаар ганцаарчилсан төрлийн эхний шатанд Унгарын Мартон Фучовичтой тоглох ёстой болсон тул хэт ойрхон ачаалалтай хоёр тоглолт хийх эсэхдээ эргэлзсэн юм. Тиймээс ганцаарчилсан төрөлд оролцох эсэхээ бодолхийлж буйгаа ярьж байлаа.
Гэхдээ Парисын талбайд буюу “Ролан Гаррос”-ын Их дуулгад 14 удаа түрүүлсэн Надаль дуртай талбайдаа гарахгүй байж чадсангүй. Фучовичийн эсрэг гарч 6:1, 4:6, 6:4-оор хожиж, хоёрдугаар шатанд шалгарснаар Новак Жоковичтой тулах болов.
Сербийн Новак Жокович өмнө нь өрсөлдөгчөө ялчихаад “Би хувьдаа өөрөөс шалтгаалах зүйлээ хийлээ. Одоо Надаль эхний өрсөлдөгчөө хожих ёстой. Бид хоёрын талбай дээрх сүүлчийн бүжиг ч байж мэдэх энэ тоглолтыг тэсэн ядан хүлээж байна” хэмээн мэдэгдсэн юм.
Новак Жокович халз тоглолтын дүнгээрээ 30:29-өөр буюу нэг ялалтаар Надалиас илүү байгаа. Испанийн домогт тамирчин хожвол тэдний хоорондын тэмцэл тэнцэнэ. Мөн Жоковичийн хэлсэнчлэн хоёр аугаа теннисчний сүүлчийн халз тоглолт ч байж мэдэх юм.
Сэтгэгдэл (0)
Сэтгэгдэл бичигдээгүй байна