АБЭ УТА ЯЛАГДСАНЫХАА ДАРАА ӨГСӨН ЯРИЛЦЛАГАДАА ЮУ ХЭЛЭВ?!

Жүдоч Абэ Ута Парисын олимпын наадмын шөвгийн 16-д Узбекистаны Диёора Келдирёовад ялагдаж, ахынхаа хамт дахин Олимпын наадамд түрүүлэх мөрөөдлөө дөрвөн жилээр ухраалаа.

Өрсөлдөгчдөө ялагдсаны дараагаар эхэр татан уйлж, ордонд цугласан олны дэмжлэг, дасгалжуулагчийнхаа тайвшруулсан үгийг мэдрэхтэй үгүйтэй байсан 24 настай тамирчин бүсгүй 3 цаг 50 минутын дараагаар бага зэрэг тайвширч, ярилцлага өгөх чадалтай болжээ.

“Одоо сэтгэл санаа тань ямар байна?” гэж сэтгүүлч асуухад “Юун түрүүнд намайг өдий хүртэл дэмжсээр ирсэн хүмүүст чин сэтгэлээсээ талархаж буйгаа хэлмээр байна” гэжээ. Ялагдсан агшинд юу мэдэрснийг лавлахад “Өрсөлдөгчийн мэх маш даацтай орсон. Ялагдсаныхаа дараагаар юу болоод буйг ч ойлгох тэнхэлгүй болж, биеэ барьж чадсангүй. Жүдо бөхөд ганцхан агшинд бүх юм шийдэгддэгийг би сайн мэднэ” гэжээ.

“Ахтайгаа хамт олимпын алтан медальтай Япондоо очих зорилготой ирсэн. Гэвч зорилгодоо хүрч чадсангүй. Сүүлийн гурван жил олон зүйл болж өнгөрлөө. Өнөөдөр ингэж ялагдсан ч гэлээ хэзээ нэгэн цагт өөрийгөө болон намайг гэх хүн бүрийг ялалт амжилтаараа баясгана гэж найдаж байна. Одоо ахыгаа аварга болж чадна гэдэгт итгэж хүлээх болно. Ах минь чадна гэдэгт итгэж байна. Би бүх чадлаараа л дэмжих болно” хэмээн Абэ Ута өгүүлжээ.

Түүний ах Абэ Хифүми жиндээ түрүүлж, олимпын хошой аварга болж чадсаныг энд тэмдэглэх хэрэгтэй биз ээ.

Абэ Утагийн хувьд бол Токиогийн олимпын дараагаар мөрөндөө хагалгаа хийлгэсэн. Харин өнгөрсөн оны аравдугаар сард нуруундаа зовиур мэдэрсэн тул сүүлийн хэдэн саруудад оролцох тэмцээнээ цөөлсөн юм. Ингэснээр Дэлхийн чансаагы жагсаалтад доошилсон учраас хэсэг толгойлж чадаагүй. Хэсэг толгойлоогүй учир Дэлхийн аваргын мөнгөн медальт Келдирёоватай шөвгийн 16-д учраа таарах нөхцөл бүрдсэн юм. Келдирёова энэ гайхамшигтай ялалтынхаа дараагаар жингийнхээ бусад хүчтэй өрсөлдөгчдийг ялсаар Олимпын аварга болсон юм.

Абэ Утаг ялагдчихаад татамийн хажууд уйлахад дасгалжуулагч нь тэвэрч, тайшруулахыг хичээж байлаа. “Сэтгэл нь их хямарсан болохоор би үг хэлж бараг чадаагүй. Миний хийж чадах ганц зүйл тэвэрч, тайтгаруулах л байлаа. Хэсэг хугацаа өнгөрсний дараагаар аажмаар бид хоёр ярьж эхэлсэн” хэмээн дасгалжуулагч нь өгүүлжээ.