ОНЦГОЙ БАЙДЛЫН САЛБАРТ ХӨНДЛӨНГИЙН ШАЛГАЛТ ОРУУЛАХЫГ ШААРДЛАА

Нийслэлийн Үйлдвэрчний эвлэлүүдийн холбооноос хэвлэлийн бага хурал хийж, Онцгой байдлын байгууллагын алба хаагчид албан үүргээ гүйцэтгэж яваад амиа алдсантай холбоотойгоор Шадар сайд болон ОБЕГ-ын удирдлагад шаардлага хүргүүлж байгаагаа мэдэгдэв.

Онцгой байдлын салбарын хөдөлмөрийн аюулгүй байдал хангагдахгүй, хувцас, хэрэгсэл нь дутуу, стандартад нийцэхгүй, алба хаагчдыг хэрхэн аюулгүй  ажиллах талаар сургалт, мэдээ мэдээллээр хангахгүй байна гэж тэд үзэж байгаа аж.

Цаашид тус салбарынхны эвлэлдэн нэгдэх эрхийг хангах, мөн хөндлөнгийн хяналт шалгалт оруулахыг шаардлаа.

Шаардлагад

• Хөдөлмөрийн аюулгүй байдал, эрүүл ахуйн хууль, стандарт хэрэгжиж байгаа эсэхэд хяналт шалгалт хийх, үүндээ мэргэжлийн болон Үйлдвэрчний эвлэлийн байгууллагыг оролцуулах
• Хамгаалах хэрэгсэл нь стандартыг хангаж байгаа эсэх талаар хөндлөнгийн байгууллагын шинжээч ажиллуулах
• Алба хаагчдын хөдөлмөрийн болон нийгмийн хамгааллын асуудал бодитоор хангагдаж байгаа эсэхийг хянах
• Сүүлийн арван жилийн хугацаанд дээрх байгууллагуудад хийсэн аудитын дүгнэлтүүдтэй танилцах боломж олгох
• Сүүлийн таван жилийн санхүүгийн тайланд хөндлөнгийн аудитын дүгнэлтийг гаргах
• Хөдөлмөрийн дотоод журам, сургалтын чанар, аюулгүй ажиллагааны зааварчилгаа зэргийг үнэлж, шалгалт хийх
• ОБЕГ-ын удирдлага мэргэжлийн түвшинд ажиллах буюу мэргэшсэн удирдлагаар хангаж ажиллах.
• Төрийн албанд ажиллаж байгаа нийт ажиллагсдын эвлэлдэн нэгдэх эрхийг хангаж ажиллах зэргийг тусгасан байна.

Дашрамд дурдахад Онцгой байдлын газарт гурван жил ажиллаад “гарсан” залуугийн ярилцлага өнөөдөр Eguur.mn сайтад нийтлэгджээ. Тэрбээр цалин бага, хувцас хэрэглэлээ 10 жилээр өмсдөг, солиулъя гэхээр өөрсдөө ав, оёод өмс гэдэг, 5.7 сая төгрөгийн үнэтэй хүчилтөрөгчийн баг эвдэрвэл өөрөө төл гэдэг тул гал руу орохдоо зүүдэггүй, дарга нар нь хувийн ажилдаа зардаг, эсэргүүцвэл “зуудаг”, сонгуульд хүртэл өөрийн эрхээр санал өгч болдоггүй хэмээн ярьсан байна.