Баянзүрх дүүргийн 26 дугаар хорооны нутаг дэвсгэрт Дүнжингаравын уулзварт болсон дэлбэрэлттэй холбогдуулан хийсэн шалгалтын талаар өнөөдөр /2024.04.04/ мэдээлэл хийлээ.
ХНХЯ, УУХҮЯ, ЗТХЯ хамтран "Дашваанжил" ХХК-ийн үйл ажиллагаанд шалгалт хийхэд тус компанид сүүлийн таван жилийн хугацаанд хөдөлмөр, нийгмийн хамгааллын чиглэлээр шалгалт хийгдээгүй байсан байна. 518 ажилтантай, 63 салбар нэгжтэй, нийслэл, 21 аймаг, 30 суманд ОХУ-аас шингэрүүлсэн хийн түлшийг импортолж, хүргэдэг уг компанид хууль тогтоомж, хамтын гэрээ хэлэлцээрт нийцүүлэн хөдөлмөрийн дотоод журмаа боловсруулаагүй, цалин хөлсний журам баталж, мөрдүүлээгүй, хөдөлмөрийн норм, норматив баталж, мөрдүүлээгүй зэрэг багагүй зөрчил илэрчээ.
Тухайлбал, 518 ажилтай томоохон компани нь хөдөлмөрийн аюулгүй байдал, эрүүл ахуйн асуудал хариуцсан ажилтангүй байсан аж. Эрсдэл өндөртэй салбарт хүний тооноос хамаарахгүйгээр хөдөлмөрийн аюулгүй байдал, эрүүл ахуйн асуудал хариуцсан ажилтантай байхыг хуульд заасан байдаг.
Ажлын байрны эрсдэлийн үнэлгээг хийгээгүй, аюултай нөхцөлд ажиллах анхааруулга, дохио тэмдэг, санамж, цахилгааны аюулгүй байдлыг хангаагүй байсан байна.
Мөн хуульд заасны дагуу эрсдэлтэй ажлын байранд ажилладаг ажилтны амь нас, эрүүл мэндийн даатгалыг хийлгээгүй. Компанид дотоод хяналт шалгалтыг зохион байгуулдаггүй байсан аж.
Түүнчлэн ажлын байрны хөдөлмөрийн нөхцөлийн үнэлгээг хийлгээгүй, ажилтнуудыг эрүүл мэндийн үзлэгт хамруулаагүй, ажлын хувцас, хамгаалах хэрэгслээр хангаагүй зэрэг зөрчил илэрсэн. Иймд шалгалт хийсэн улсын байцаагч нар тус компанид торгууль, нөхөн төлбөр тавьсан талаар ХНХЯ-ны газрын дарга Б.Нарангарав мэдээлэв.
Сэтгэгдэл (0)
Сэтгэгдэл бичигдээгүй байна