Үндэсний бүтээмжийн үзэл баримтлалыг тодорхойлж, үндэсний хэмжээнд бүтээмжийн хөдөлгөөнийг эрчимжүүлэх зорилго бүхий “Бүтээмжийн хувьсал” чуулган өнөөдөр /2024 оны 12 дугаар сарын 17/-нд боллоо. Гэр бүл, хөдөлмөр, нийгмийн хамгааллын яам, Азийн бүтээмжийн байгууллага, Монголын бүтээмжийн холбоо хамтран зохион байгуулсан тус чуулган бүтээмжийн хувьсгалыг өрнүүлж, төр, хувийн хэвшлийн бүх түвшинд бүтээмжийг нэмэгдүүлэх бодлого, зохицуулалт, арга хэмжээг төлөвлөж хэрэгжүүлэх зорилгод чиглэгджээ. Өнөөдрийн байдлаар Монгол Улсын хөдөлмөрийн дундаж бүтээмж дэлхийн дунджаас 3.6 дахин, БНСУ-аас 5.4 дахин бага байна.
Хөдөлмөрийн бүтээмж, цалин хөлс шууд хамааралтай. Манай улсад хамгийн их бүтээмжтэй, цалин өндөртэйд уул уурхай, мэдээлэл технологи, банкны салбар ордог. Тиймээс оюуны хөдөлмөрийг дэмжиж, цахим болон зайнаас ажиллах ажлын байрыг нэмэгдүүлж, монгол хүний хөдөлмөрийн бүтээмж, цалин хөлсийг жил бүр нэмэгдүүлэх мөн хөдөлмөрийн аюулгүй байдлыг бүх түвшинд баримталсан зохистой ажлын байрыг бий болгож, бүтээмжийн экосистемийг бий болгох төлөвлөгөөтэй ажиллана гэж Гэр бүл, хөдөлмөр нийгмийн хамгааллын яамнаас мэдээллээ.
Сэтгэгдэл (0)
Сэтгэгдэл бичигдээгүй байна