Өнөөдөр билгийн тоолын өвлийн тэргүүн сарын шинийн нэгэн, Монгол бахархлын өдөр.
Эрдэмтэд судлаачид болон Шинжлэх ухааны академийн саналд үндэслэн Монгол Улсын Ерөнхийлөгчийн 2012 оны 1 сарын 9-ний өдрийн 4 тоот зарлигаар эзэн богд Чингис хааны мэндэлсэн огноог албан ёсны болгож, билгийн тооллын өвлийн тэргүүн сарын шинийн нэгэн гэж тогтоон, уг өдрийг "Монгол бахархлын өдөр" болгон тэмдэглэн өнгөрүүлж байхаар болсон түүхтэй.
Их эзэн Чингис хааны мэндэлсний 862 жилийн ой, “Монгол бахархлын өдөр”-ийг тохиолдуулан Д.Сүхбаатарын талбайд Монгол Улсын Төрийн далбааг мандуулах, Чингис хааны алтан сургаал, айлдвараас сонордуулан, Төрийн тугийг цэнгүүлж байна.
Түүнчлэн Монгол Улсын түүх судлалыг дэмжих тухай Ерөнхийлөгчийн зарлигт гарын үсэг зурах, гардуулах ёслолын үйл ажиллагаа болно.
Монгол бахархлын өдрөөр жил бүр улс орныхоо тусгаар тогтнол, бүрэн эрхт байдал, үндэсний эв нэгдлийг бататган бэхжүүлэх, төрт ёс, түүх соёлынхоо уламжлалыг гүнзгий судалж, хойч үедээ өвлүүлэх, тэдгээрийг дэлхий дахинд сурталчлан таниулах үйлсэд үнэтэй хувь нэмэр оруулж, төр, нийгэм, үндэстний өмнө онцгой гавьяа байгуулсан нэг иргэнийг Монгол Улсын төрийн дээд шагнал-тэргүүн зэргийн одон “Чингис хаан” одонгоор шагнадаг уламжлалтай. Энэ удаад “Чингис хаан” одонгоор НҮБ-ын Ерөнхий нарийн бичгийн дарга асан Бан Ги Мүнийг шагнахаар болсон юм.
Мөн Их Эзэн Чингис хааны хөшөөнд хүндэтгэл үзүүлж, чансаа өндөр 128 бөхийн барилдааныг уламжлал ёсоор зохион байгуулна. Түрүүлсэн бөхөд Монгол Улсын Ерөнхийлөгчийн нэрэмжит “Чингис хаан” шилжин явах цомыг анх удаа гардуулах юм.
Монгол Улсын Ерөнхийлөгчийн зарлигийн дагуу 2024 оны 11 дүгээр сарын 4-ний өдөр Богд хааны Ордон музейд тууль хайлахаар хөтөлбөрт тусгажээ.
Сэтгэгдэл (0)
Сэтгэгдэл бичигдээгүй байна