ЖДҮ ЭРХЛЭГЧДИЙН БРЭНДИЙН ҮЗЭСГЭЛЭН ТӨВ ТАЛБАЙД

- НЭГ СУУРИН -НЭГ БҮТЭЭГДЭХҮҮН -

Жижиг, дунд үйлдвэрийн газар, Нийслэлийн "Жижиг, Дунд Үйлдвэр, Үйлчилгээг Дэмжих Төв" НӨҮГ хамтран “БИЧИЛ, ЖИЖИГ, ДУНД ҮЙЛДВЭР, ҮЙЛЧИЛГЭЭ ЭРХЛЭГЧДИЙН ӨДӨР 2024” үзэсгэлэн, худалдааг Сүхбаатарын талбайд  дэлгэжээ. 

2024 оны зургадугаар сарын 12-16-ны өдрүүдэд үргэлжилж буй тус арга хэмжээнд нийслэлээс гадна 21 аймгийн үйлдвэрлэгчид зорин ирж оролцож байгаа бөгөөд нийт 300 шахам аж ахуйн нэгжийн 10 мянга гаруй бүтээгдэхүүн тавигдсан байна. Энэ нь хэрэглэгчид нэг дороос үндэсний брэнд бүтээгдэхүүнээ худалдан авах сайхан боломжийг бүрдүүлжээ. Мөн уг үзэсгэлэн худалдаанд "НЭГ СУУРИН - НЭГ БҮТЭЭГДЭХҮҮН" аяны хүрээнд 21 аймгийн онцлох бүтээгдэхүүнийг танилцуулж байна.

Талбайг зорьж, ЖДҮ эрхлэгчдийн бүтээгдэхүүн нутаг нутгийн брэндийг сонирхогчид олон байв. Нэн ялангуяа гадаадын жуулчид манай үндэсний бүтээгдэхүүнийг үзэж, худалдан авах нь элбэг харагдаж байлаа. Гар урлал, оёдол, цагаан идээ, хүнс, гутал, хувцас гээд бүхий л төрлийн бүтээгдэхүүн дэлгэсэн энэхүү том  үзэсгэлэнд үндэсний үйлдвэрлэгчдийн бүтээгдэхүүн харьцангуй хямд үнээр үйлдвэрлэгчээс шууд хэрэглэгчийн гарт очиж байгаа нь том давуу тал юм.

НҮБ-ын Тогтвортой хөгжлийн зорилтуудыг хэрэгжүүлэхэд Бичил, жижиг, дунд үйлдвэр, үйлчилгээ эрхлэгчдийн хувь нэмрийг олон нийтэд таниулах зорилгоор зургадугаар сарын 27-ны өдрийг НҮБ-ын Ерөнхий Ассамблей “Бичил, жижиг, дунд үйлдвэр, үйлчилгээний өдөр” болгон тэмдэглэх тогтоолыг 2017 онд баталсан юм. Уг тогтоолыг дэлхийн өнцөг булан бүрийн 5 тэрбум гаруй хүнийг төлөөлсөн 54 гишүүн орон дэмжжээ. 

Бичил, жижиг, дунд үйлдвэр, үйлчилгээ эрхлэгчид нь дэлхийн хэмжээнд бизнесийн 90 хувь,  ажил эрхлэлтийн 60-70 хувь, дотоодын нийт бүтээгдэхүүний 50 хувийг бүрдүүлдэг юм.