БИЧИЛ, ЖИЖИГ, ДУНД ҮЙЛДВЭР, ҮЙЛЧИЛГЭЭ ЭРХЛЭГЧДИЙН ӨДРИЙГ ЗОХИОН БАЙГУУЛНА

--НЭГ СУУРИН " НЭГ БҮТЭЭГДЭХҮҮН -

Монгол Улсад “БИЧИЛ, ЖИЖИГ, ДУНД ҮЙЛДВЭР, ҮЙЛЧИЛГЭЭ ЭРХЛЭГЧДИЙН ӨДӨР 2024”-ийг Засгийн газрын хэрэгжүүлэгч агентлаг Жижиг, дунд үйлдвэрийн газар, Нийслэлийн "Жижиг, Дунд Үйлдвэр, Үйлчилгээг Дэмжих Төв" НӨҮГ хамтран 2024 оны 6 дугаар сарын 12-16-ны өдрүүдэд Сүхбаатарын талбайд зохион байгуулна. Мөн "НЭГ СУУРИН - НЭГ БҮТЭЭГДЭХҮҮН" аяны хүрээнд 21 аймгийн онцлох бүтээгдэхүүнийг танилцуулна. 

НҮБ-ын Тогтвортой хөгжлийн зорилтуудыг хэрэгжүүлэхэд Бичил, жижиг, дунд үйлдвэр, үйлчилгээ эрхлэгчдийн хувь нэмрийг олон нийтэд таниулах зорилгоор зургадугаар сарын 27-ны өдрийг НҮБ-ын Ерөнхий Ассамблей “Бичил, жижиг, дунд үйлдвэр, үйлчилгээний өдөр” болгон тэмдэглэх тогтоолыг 2017 онд баталсан юм. Уг тогтоолыг дэлхийн өнцөг булан бүрийн 5 тэрбум гаруй хүнийг төлөөлсөн 54 гишүүн орон дэмжсэн байна.

Бичил, жижиг, дунд үйлдвэр, үйлчилгээ эрхлэгчид нь дэлхийн хэмжээнд бизнесийн 90 хувь,  ажил эрхлэлтийн 60-70 хувь, дотоодын нийт бүтээгдэхүүний 50 хувийг бүрдүүлдэг. Тэд нийгмийн тулгуур болж, орон нутгийн болон үндэсний эдийн засаг, иргэдийн ялангуяа амьжиргааны түвшин доогуур иргэд, эмэгтэйчүүд, залуучууд зэрэг нийгмийн эмзэг бүлгийг дэмжихэд хувь нэмрээ оруулдаг.

Бичил, жижиг, дунд үйлдвэр, үйлчилгээ эрхлэгчдийг дэмжсэнээр иргэдийн амьдралын чанарт нөлөөлөх, ажлын байр бий болгох, эдийн засгийн тэгш өсөлтийг дэмжих боломжтой юм.