ЖДҮ САНГААС 37 ТӨСӨЛД 7.4 ТЭРБУМ ТӨГРӨГИЙН ЗЭЭЛ ОЛГОХООР БОЛОВ

Жижиг, дунд үйлдвэрийг хөгжүүлэх сангаас хөнгөлөлттэй зээл олгох “Төсөл сонгон шалгаруулах хорооны хурал” өнөөдөр /2024.04.25 / боллоо.

Зээлд хамрагдахаар Улаанбаатар хотод 41,1 тэрбум төгрөгийн 213 төсөл ирүүлснээс сонгон шалгаруулалтын сүүлийн буюу дөрөв дэх шат болох "ТӨСӨЛ СОНГОН ШАЛГАРУУЛАХ ХОРООНЫ ХУРАЛ"-д 9.5 тэрбум төгрөгийн хүсэлт бүхий 46 аж ахуйн нэгж  төслөө танилцуулав.

Төсөл сонгон шалгаруулах хорооны хуралд эдгээр аж ахуйн нэгжийн төлөөлөл тус бүр 5 минутаар төслөө танилцуулж, хорооны гишүүд зарим зүйлийг тодруулж хариулт авсан юм. Энэхүү хурлыг Засгийн газрын хэрэгжүүлэгч агентлаг Жижиг, дунд үйлдвэрийн газрын пэйж хуудсаар шууд нэвтрүүлж, нээлттэй, ил тод байдлыг хангаж ажиллажээ. 

Төсөл сонгон шалгаруулах хорооны хурлын дүнгээр дараах 13 салбар чиглэлийн, 37 төсөлд 7,4 тэрбум төгрөгийн зээл олгохоор боллоо. Үүнд:

• Арьс ширэн бэлэн бүтээгдэхүүн үйлдвэрлэл
• Гоо сайхны бүтээгдэхүүн үйлдвэрлэл
• Гурил, гурилан бүтээгдэхүүн үйлдвэрлэл
• Мах, дайвар бүтээгдэхүүн боловсруулах
• Мод модон бүтээгдэхүүн үйлдвэрлэл
• Оёмол, сүлжмэл бүтээгдэхүүн үйлдвэр
• Сүү сүүн бүтээгдэхүүн боловсруулах
• Хог хаягдал дахин боловсруулах үйлдвэрлэл
• Хүлэмжийн аж ахуй
• Хүнсний зоорь, агуулах
• Хүнсний зориулалтын сав, баглаа боодлын үйлдвэр
• Хүүхдийн хоол, тэжээлийн үйлдвэрлэл
• Цэвэр усны үйлдвэрлэл