Жижиг дунд үйлдвэрийн газрын даргын тушаалаар батлагдсан ажлын хэсэг Дархан-Уул, Сэлэнгэ аймагт зээлийн хүсэлт ирүүлсэн 29 аж ахуйн нэгжид нарийвчилсан судалгааг хийж ажиллажээ.
Хүнс, хөдөө аж ахуй, хөнгөн үйлдвэрийн сайдын тушаалаар Дархан-Уул аймагт батлагдсан нэг тэрбум төгрөгийн эх үүсвэрт 31 аж ахуйн нэгж хүсэлтээ ирүүлсэн бөгөөд тэдний зээлийн нийт өртөг 4.1 тэрбум төгрөг байна. Эдгээрээс сонгон шалгаруулалтын гуравдугаар шат буюу нарийвчилсан судалгаанд 20 аж ахуйн нэгж өрсөлдөж байгаа бөгөөд нийтдээ 2.6 тэрбум төгрөгийн төсөл ирүүлжээ.
Сэлэнгэ аймагт мөн сайдын тушаалаар батлагдсан 900 сая төгрөгийн эх үүсвэрт 3.7 тэрбум төгрөгийн зээл авахаар 25 аж ахуйн нэгж хүсэлтээ ирүүлж, нарийвчилсан судалгаанд 9 аж ахуйн нэгж өрсөлдөж байгаагийн төслийн үнэлгээ нийт нэг тэрбум төгрөг байна.
“ЖДҮХС-аас хөнгөлөлттэй зээл олгох, сонгон шалгаруулах, дамжуулан зээлдүүлэх, эргэн төлүүлэх, хяналт тавих журам”-д зааснаар нарийвчилсан судалгаанд 70-аас дээш оноо авсан төсөл хэрэгжүүлэгч нь дэд хорооны хуралд төслөө танилцуулах юм.
Төсөл сонгон шалгаруулах дэд хороог төрийн байгууллагын 3, төрийн бус байгууллагын 4 төлөөлөлтэй байгуулж, аймгийн Засаг дарга баталгаажуулдаг байна.
Сэтгэгдэл (0)
Сэтгэгдэл бичигдээгүй байна