Хүний эрхийн Үндэсний Комиссоос хүйтний улиралд хурдан морины уралдаан зохион байгуулсны улмаас унаач хүүхдүүд бэртэж гэмтсэн, хөгжлийн бэрхшээлтэй болсон, амь нас нь хохирсон явдал гарсаар байгааг анхааруулж, хориглосон хугацаанд хурдан морины уралдаан, үсэргээ зохион байгуулахгүй байх тухай Комиссын гишүүний зөвлөмжийг аймаг, Нийслэлийн Засаг дарга нарт жил бүр хүргүүлж иржээ.
Гэтэл 2024 он гарснаас хойш Ховд, Сүхбаатар, Төв аймгийн нутаг дэвсгэрт хурдан морины уралдаан зохион байгуулсан тохиолдол гарсан байна.
Иймээс сумдын Засаг дарга нарт дээрх асуудлаар үүрэг, чиглэл өгч биелэлтийг хангуулж ажиллах, энэ чиглэлээр гарсан тогтоолын хэрэгжилтэд хяналт тавих үүргээ биелүүлээгүй, харьяалах нутаг дэвсгэрт нь хурдан морины уралдаан, сунгаа зохион байгуулагдсан сумын Засаг даргад хуульд заасан арга хэмжээ авах тухай шаардлагыг тухайн аймгийн Засаг дарга нарт 2024 оны 2 дугаар сарын 20-ны өдөр хүргүүлжээ.
Шаардлагын хэрэгжилтийг хангаж ажиллах хүрээнд үе шаттай авч хэрэгжүүлж байгаа бөгөөд зарим албан тушаалтанд хариуцлага тооцсон тухай албан тайлбарыг дээрх аймгуудаас Комисст ирүүлсэн байна.
Тухайлбал,
- Төв аймгийн Сэргэлэн сумын Засаг дарга Л.Төмөрчөдөрт Харьяалах нутаг дэвсгэрт хууль тогтоомжид хяналт тавих үүргээ хангалтгүй биелүүлсэн, холбогдох шийдвэрийн хэрэгжилтийг хангаж ажиллаагүй тул сануулах сахилгын шийтгэл ногдуулсан.
- Мөрдөх чиг үүрэгтэй байгууллагаас дээрх хурдан морины уралдаантай холбоотой зөрчлийн хэрэг үүсгэн шалгаж байгаа бөгөөд Зөрчил щалган шийдвэрлэх тухай хуулийн дагуу холбогдогч Э-д Зөрчлийн тухай хуулийн дагуу арга хэмжээ авсан.
- Сүхбаатар аймгийн Онгон сумын Засаг дарга Ө.Мөнхбатад “нийт ажилтанд зарлах хэлбэрээр нээлттэй сануулах” сахилгын шийтгэл ногдуулсан.
- Хүүхдийн эрхийн улсын байцаагчаас хориглосон хугацаанд хурдан морины үсэргээ зохион байгуулсан 5 хүнд холбогдуулан Зөрчлийн тухай хуульд зааснаар тус бүрд нь 500,000 төгрөгөөр торгох шийтгэл ногдуулсан.
- Ховд аймгийн Эрдэнэбүрэн суманд 2024 оны 2 дугаар сарын 17-ны өдөр хурдан морины уралдаан зохион байгуулагдсан гомдол, мэдээллийн мөрөөр аймгийн Хүүхэд, гэр бүлийн хөгжил, хамгааллын газрын Хүүхдийн эрхийн улсын байцаагч хяналт шалгалт хийж, зөрчлийн мэдээллийг аймгийн Прокурорын газарт шилжүүлсэн. Мөн сумдын Засаг дарга нарт хориглосон хугацаанд морин уралдаан, үсэргээ, сунгаа зохион байгуулахгүй байх, хурдан морь унаач хүүхдийн амь нас, аюулгүй байдалд эрсдэл үүсгэж болзошгүй талаар Морин спорт, уяачдын холбоод, иргэд, малчдад мэдээ, мэдээлэл хүргэж ажилласан. Аймгийн Хүүхэд, гэр бүлийн хөгжил, хамгааллын газар, аймгийн Цагдаагийн газрын хамтарсан эргүүл хяналтын хуваарь гаргаж, зөрчлөөс сэргийлэх арга хэмжээ авч ажиллаж байгаа талаарх тайлбарыг тус тус ирүүлжээ.
Сэтгэгдэл (0)
Сэтгэгдэл бичигдээгүй байна