УУР АМЬСГАЛЫН ӨӨРЧЛӨЛТИЙГ CONTEMPORARY УРЛАГААР ИЛЭРХИЙЛСЭН ҮЗЭСГЭЛЭНГ СOP17 ХУРЛЫН ҮЕЭР ДЭЛГЭНЭ

Байгаль орчин, уур амьсгалын өөрчлөлтийн сайд Ц.Сандаг-Очир, Дэд сайд Б.Мөнхтамир болон холбогдох албаныхан тав дахь жилдээ амжилттай зохион байгуулагдаж буй B Contemporary Art Gallery (BCAG)-ийн уламжлалт CONTEMPORARY SERIES хамтарсан үзэсгэлэнг үзэж, залуу уран бүтээлчидтэй санал солилцов.

Уур амьсгалын өөрчлөлтийг шинжлэх ухааны тайлангаар бус, урлагийн мэдрэмжээр харж, илэрхийлж буй залуу уран бүтээлчдийн “Сүүлчийн зүүд” нэртэй үзэсгэлэн энэ удаад усны асуудлыг хөндөж буйгаараа онцлогтой.

Хүн байгалиас тусдаа оршдоггүй, өөрчлөлт бүр нь бидний дурсамж, айдас, итгэл, ирээдүйд нөлөөлдөг хэмээн илэрхийлсэн тус үзэсгэлэнд есөн уран бүтээлч өөр, өөрийн уран бүтээлийн хэлээр уур амьсгалын өөрчлөлтийн ул мөрийг өгүүлж байна.

Сүйрэл, алдагдсан цаг хугацааг, ирээдүйд үлдэх найдвар зэргийг өгүүлэх эдгээр уран бүтээлүүдээс хүн бүр өөр, өөр ухаарал, онцгой мэдрэмжийг авах боложмтой. Олон нийтийг соён гэгээрүүлэх, байгаль ээлтэй хандлага төлөвшүүлэхэд урлаг онцгой үүрэгтэй гэдгийг сайд Ц.Сандаг-Очир онцлов. 

Байгаль орчны асуудлыг хөндөн содон бүтээлээ нийтэд дэлгэж буй залууст яамны удирдлагын зүгээс талархал илэрхийлээд СОP17 хурлын үеэр олон нийтэд хүргэхэд дэмжин хамтран ажиллахаар боллоо.

• 2021 онд CONTEMPORARY SERIES #01–05 үзэсгэлэн "Агаар орчны бохирдлыг бууруулах" аяны хүрээнд,
• 2022 онд CONTEMPORARY SERIES #06–08 үзэсгэлэн "Усаа хэмнэж, эх дэлхийгээ хайрлая" уриатай,
• 2023 онд CONTEMPORARY SERIES #09 үзэсгэлэн "Эрх чөлөө ба энх тайван" сэдвээр,
• 2025 онд "Зураг биш зураг" үзэсгэлэн тус тус гаргажээ.

Энэ удаагийн CONTEMPORARY SERIES #11 – "СҮҮЛЧИЙН ЗҮҮД | УУР АМЬСГАЛЫН ӨӨРЧЛӨЛ" хамтарсан үзэсгэлэнтэй нийлээд 100 гаруй уран бүтээлчийн 200 гаруй бүтээлтэй болсон байна. Эдгээр уран бүтээлээс сонгон СОР17 хурлын үеэр олон нийтэд дэлгэн үзүүлэхээр боллоо. Мөн тэдний бүтээж буй Байгаль орчин, уур амьсгалын өөрчлөлтийг өгүүлэх “Сүүлчийн зүүд” баримтат киноны нээлт болно. Уулзалтын үеэр “Алтай Таван Богд Өв Хамгаалах Сан”-гийн хэрэгжүүлж буй тус баримтат киноны Concept Trailer-ийг танилцууллаа.

Байгаль орчин, экологийн өөрчлөлт, нийгмийн өмнө тулгамдаж буй асуудлуудыг орчин үеийн урлагийн олон талт илэрхийллээр хөндөн, урлагийн хэлээр дамжуулан олон нийтийн анхааралд хүргэхийг зорьж буй үзэсгэлэн болон баримтат кино СОР17 бага хурлын “Ногоон бүс”-ийн хөтөлбөрт орсон тул иргэд, олон нийт нээлттэй үзэж сонирхох боломжтой.