Үндэсний агаарын тээвэрлэгч МИАТ ТӨХК 70 жилийн ойгоо тэмдэглэж, баярын хурлаа хийлээ. Баярын хурлын нээлтэд ЗТЯ-ийн сайд Б.Дэлгэрсайхан, ТӨХ-ны дарга Б.Цэнгэл, авиа компаниудын төлөөлөл оролцож баярын мэндчилгээ дэвшүүлэв. Мөн ажил хөдөлмөрийн өндөр амжилт гаргасан ажилтан, албан хаагчдыг Монгол Улсын Ерөнхийлөгчийн зарлигаар төрийн одон медалиар шагнаж урамшууллаа.
Монгол Улсын Засгийн газрын тэргүүн, УИХ-ын гишүүн Зам тээврийн сайд Б.Дэлгэрсайхан баяр хүргэж хэлсэн үгэндээ 1956 оны 7 сарын 7-нд орон нутагт анхны нислэгээ үйлдэж эхэлсэн МИАТ өнөөдөр Монгол Улсын үндэсний агаарын тээврийн салбарыг манлайлагч компани болон хөгжиж,10 агаарын хөлгөөр олон улсын 14, орон нутгийн 10 чиглэлд тогтмол нислэг үйлдэж байна. Өнгөрсөн 70 жилийн хугацаанд нийт 25.7 сая зорчигчийг аюулгүй, найдвартай тээвэрлэж, дэлхийг 14.7 мянга гаруй удаа тойрохтой дүйцэх замыг туулсан нь Монголын иргэний нисэхийн салбарын хөгжил, хамт олны ур чадвар, хичээл зүтгэлийн тод илэрхийлэл юм хэмээн онцлоод салбарын хамт олонд баяр хүргэж, ажлын амжилт хүсэв.
ТӨХ-ны дарга Б.Цэнгэл МИАТ ТӨХК нь байгуулагдсан цагаасаа хойш Монгол Улсыг дэлхийтэй холбох эрхэм үүргээ нэр төртэй биелүүлж, улс орны эдийн засаг, худалдаа, аялал жуулчлал, хөрөнгө оруулалт, олон улсын хамтын ажиллагаанд бодит хувь нэмэр оруулсаар ирсэн Монгол Улсын төрийн далбааг тээвэрлэгч, эх орноо дэлхийд сурталчилж байгаа үндэсний авиа компани болохыг тэмдэглээд, сүүлийн жилүүдэд засаглал, менежмент, үйлчилгээний чанар, нислэгийн аюулгүй байдал, олон улсын хамтын ажиллагаагаа шинэ шатанд гаргаж, дэлхийн жишигт нийцсэн хөгжлийг тууштай бүтээж байгаа тус компанийн хамт олонд баярын мэндчилгээ дэвшүүлэв.
МИАТ ТӨХК-ийн Гүйцэтгэх захирал Т.Тэлмэн “Манай хамт олон өнгөрсөн хугацаанд Олон улсын Иргэний нисэхийн байгууллага /ICAO/, Олон улсын агаарын тээврийн холбоо /IATA/ -ноос тавьж байгаа аюулгүй ажиллагааны болон газрын үйлчилгээний ISAGO шалгалтуудад 98-100 хувийн амжилт үзүүлж, олон улсын өндөр стандартыг хангаснаа албан ёсоор баталгаажуулсан, Төрийн өмчит компанийн хувьд улс орны нэн хариуцлагатай, чухал үеүдэд тусгай үүргийн нислэг үйлдэж, 2020-2021 онд цар тахлын голомтоос, 2026 онд Ойрх Дорнодын дайны бүсээс өөрийн орны иргэдийг авчирсан амжилтаар 70 жилийн ойгоо угтаж байна. Цаашид бид агаарын тээврийн зах зээлд нээлттэй, өрсөлдөх чадвартай хариуцлагатай, найдвартай, чанартай үйлчилгээг үзүүлдэг олон улсын агаарын тээвэрлэгч болох зорилт тавихын зэрэгцээ газрын үйл ажиллагаа, агаарын хөлгийн засвар үйлчилгээнээс орлого олж, улс орныхоо нийгэм эдийн засгийн хөгжилд хувь нэмрээ оруулахад анхааран ажиллаж байна. Энэ бүхэн манай хамт олны, нийт ажилтан албан хаагчдын бүтээсэн түүх, ажлын амжилт юм” хэмээн тэмдэглэв.
Сэтгэгдэл (0)
Сэтгэгдэл бичигдээгүй байна