Үндэсний агаарын тээвэрлэгч МИАТ ТӨХК 70 жилийн тохиолдуулан "Монгол Шуудан" ХК-тай хамтран "МИАТ – 70 жил" сэдэвт шуудангийн дурсгалын маркийг өнөөдрөөс /2026.07.06/ эхлэн гүйлгээнд гаргалаа.
Монгол Улс 1956 оны долоодугаар сарын 7-ны өдөр Ан-2 агаарын хөлгөөр Дорнод, Хөвсгөл, Ховд аймгийн чиглэлд анхны зорчигч, шуудан тээврийн нислэгийг үйлдсэнээр МИАТ-ын үндэс суурь тавигдаж, Монгол Улсын иргэний агаарын тээврийн хөгжлийн түүх эхэлжээ. Өнгөрсөн 70 жилийн хугацаанд МИАТ ТӨХК үндэсний агаарын тээврийн тэргүүлэгч компани болон хөгжиж, 2025 онд Олон улсын агаарын тээврийн үнэлгээний "Skytrax" байгууллагаас дэлхийн хамгийн их ахиц дэвшил гаргасан 10 агаарын тээвэрлэгчийн нэгээр шалгарсан билээ.
Маркийн дүрслэлд МИАТ ТӨХК-ийн албан ёсны лого болон тэнгэрт хөөрөн нисэж буй Boeing 787-9 Dreamliner агаарын хөлгийг дүрсэлжээ. Тус компани 2023 оноос уг агаарын хөлгийг нислэгийн үйл ажиллагаандаа ашиглаж эхэлсэн нь олон улсын жишигт нийцсэн үйлчилгээ, технологийн шинэчлэл, хөгжлийн илэрхийлэл болсон юм.
Энэхүү марк нь МИАТ ТӨХК-ийн 70 жилийн түүхэн замнал, үндэсний иргэний агаарын тээврийн хөгжил, Монгол Улсыг дэлхийтэй холбосон эрхэм үйлсийг мөнхлөн үлдээсэн филателийн үнэ цэнтэй бүтээл юм.
Монголын иргэний агаарын тээвэр, МИАТ компанийн үе үеийн нисгэгч, бүхээгийн ажилтан, газрын үйл ажиллагаа болон инженер техникийн ажилтнуудад түүхт 70 жилийн ойн баярын мэндийг дэвшүүлье.
Сэтгэгдэл (0)
Сэтгэгдэл бичигдээгүй байна