XVII жарны “Сүрээр дарагч” хэмээх гал морин жилийн сар шинийн баярын босгон дээр Монголын Өмгөөлөгчдийн Холбооны гишүүн, өмгөөлөгч Ядмаагийн Нямжав Төрийн дээд шагнал “Гавьяат хуульч” цолоор шагнууллав.
Ахмад өмгөөлөгч Я.Нямжав нь Монголын Өмгөөлөгчдийн Холбооны Их хурлаас удирдах дээд байгууллагад удаа дараа сонгогдож, нийтдээ 27 жил сонгуульт үүрэг хүлээж, 1990-2004 оны хооронд Холбооны хамгийн том салбар болох Нийслэлийн өмгөөлөгчдийн зөвлөлийн даргаар 14 жил ажилласан. Тодруулбал, Монголын Өмгөөлөгчдийн Холбооны Удирдах зөвлөлийн гишүүнээр 9 удаа, Холбооны орон тооны бус Мэргэжлийн хорооны Нарийн бичгийн даргаар 10 жил, Сахилгын хорооны гишүүнээр 4 жил сонгогдон ажилласан удирдах ажилтан, тэргүүний өмгөөлөгч билээ.
Энэ хугацаандаа өмгөөлөх байгууллагын нийгэмд гүйцэтгэх үүргийг өндөржүүлж, байр суурийг бэхжүүлэх, өмгөөллийн үйл ажиллагааны эрх зүйн үндэс, арга барилыг боловсронгуй болгон өргөжүүлэх, өмгөөлөгчдийн тоог нэмэгдүүлж тэдний эрх үүрэг, хариуцлагын тогтолцоог шинэчлэхэд өөрийн сэтгэл зүтгэл, бүтээлч хөдөлмөрийг зориулсан нэгэн юм.
Түүнчлэн Хууль зүйн зөвлөгөө туслалцааны цар хүрээг тэлэх, өмгөөллийн үйл ажиллагааны эрх зүйн үндэс, арга барилыг боловсронгуй болгох зорилгоор Өмгөөллийн тухай хуулийг 3 удаа шинэчлэн боловсруулахад оролцож, түүнийг хэрэгжүүлэхтэй холбогдсон 40 гаруй дүрэм, журмыг боловсруулан мөрдүүлсэн төдийгүй өмгөөлөгчдөд зориулсан 60 гаруй заавар, гарын авлага бэлтгэж, өмгөөлөгч П.Долгор, Н.Ламжав нартай хамтран “Эрүүгийн байцаан шийтгэх ажиллагаанд өмгөөлөгч оролцох арга зүй”, “Өмгөөллийн үйл ажиллагаанд холбогдох хууль тогтоомжийн эмхэтгэл”, “Хуульчдын сонгон шалгаруулалтын тест”, “Үе үеийн өмгөөлөгч” зэрэг ном, эмхэтгэлийг эрхлэн гаргасан нь өмгөөллийн салбарын хөгжилд бодитой хувь нэмэр оруулсан байдаг.
Сэтгэгдэл (0)
Сэтгэгдэл бичигдээгүй байна