Байгаль орчин, уур амьсгалын өөрчлөлтийн сайд Б.Батбаатар ой, хээрийн гал түймрээс урьдчилан сэргийлэх, тэмцэх ажлын албан даалгавар гаргасан.
Энэ дагуу Сэлэнгэ аймгийн Ерөө суманд гарсан түймрийг унтраахад дэмжлэг үзүүлэх зорилгоор Сэлэнгэ, Дархан-Уул аймгийн Ус цаг уур, орчны шинжилгээний төвийн хамтарсан 4 экспедиц нэгдсэн төлөвлөгөөний дагуу 2025 оны 6- р сарын 26-ны өдөр үйл ажиллагаа явуулж 12ш борооны пуужингаар цаг агаарт зориудаар амжилттай нөлөөлжээ.
Ажиллагааны үр дүнд Ерөө суманд асаж байгаа түймрийн голомтоос 20-30км-т бороо орж, үүлний масс түймрийн голомт руу шилжсэн.
Сэлэнгэ-Бороо 1 экспедиц 6-р сарын 26-ны 6 цаг 5 минутад Орхон сумын Нарст гуу гэдэг газарт, 16 цаг 47 минутад Мандал сумын Хужиртын ам гэдэг газарт, Бороо-3 экспедиц Ерөө сумын Хонгорын нам даваа орчимд цаг агаарт зориудаар нөлөөлөх үйл ажиллагааг тус тус явуулсны үр дүнд Баруунбүрэн 2.0 мм, Хушаат 1.5 мм, Зүүнбүрэн 0.4 мм, Түшиг 1.2 мм, Бугант 6.0 мм, Сүхбаатар 0.8 мм, Орхон 7.0 мм, Орхонтуул 5.0 мм, Баянгол 18.0 мм, Мандал 8.2 мм бороо оржээ.
Мөн Нийслэлийн Засаг даргын тамгын газрын хүсэлтээр “Хүй долоон худаг” орчимд ЦУОШГазрын хур тунадас нэмэгдүүлэх экспедиц ажиллаж 6ш борооны пуужин харвасан. Агаарын халалт, хуурайшилттай, үүлний шилжилт хурдан байсан хэдий ч амжилттай нөлөөлж хур тунадас нэмэгдүүлжээ.
Өнөөдөр /06.27/ Сэлэнгэ аймгийн экспедиц Тужийн нарсанд гарсан түймэр унтраахад дэмжлэг үзүүлэхээр цаг агаарт зориудаар нөлөөлөхөөр ажиллаж байна.
Сэтгэгдэл (0)
Сэтгэгдэл бичигдээгүй байна