НҮБ-ын Ерөнхий Ассамблей 1993 онд гуравдугаар сарын 22-ны өдрийг “Дэлхийн усны өдөр” болгон зарлан тунхагласан байдаг.
Усны газраас Дэлхийн усны өдрийг тэмдэглэн өнгөрүүлэх ажлын хүрээнд усны сав газар болон сав газрын захиргаадын мэдээллийг хүргэж байгаа юм. Монгол Улсын хэмжээнд 29 сав газар, 21 сав газрын захиргаа байдаг. Тэдгээрээс Хөвсгөл нуур Эгийн голын сав газартай холбоотой мэдээллийг нийтэллээ.
Хөвсгөл нуур буюу Хөвсгөл далай нь Монгол улсын хойд хэсэгт Хөвсгөл аймагт далайн түвшнээс 1645 метр өндөрт оршдог цэнгэг устай нуур. Энэ нуур нь Монголын хамгийн их эзлэхүүнтэй, хамгийн гүн нуур юм. Хөвсгөл нуур нь дэлхийн арван долоон эртний нуурын нэг юм. 2 сая гаруй жилийн настай хэмээн тооцоолсон байдаг. Нийт усны эзлэхүүн 381 км³ байдаг нь дэлхийн цэнгэг усны 0.4 хувьтай тэнцэнэ.
Эгийн гол нь Монгол орны хамгийн гүн цэнгэг Хөвсгөл нуураас эх аван Хөвсгөл, Булган аймгуудын нутгаар урсан Сэлэнгэ мөрөнд зүүн гараас нь цутгадаг гол юм. Уг гол нь Хөвсгөл нуураас эх аван урсдаг цорын ганц гадагш урсгалтай гол юм.
Хөвсгөл нуур-Эгийн голын сав газрын захиргаа нь БОАЖ-ын сайдын тушаалаар 2014 онд байгуулагдсан. Одоо Хөвсгөл аймгийн Мөрөн суманд үйл ажиллагаагаа явуулж байна.
Тус сав газрын захиргаанд хамаарагдах уст цэгийн тоо бүртгэлийн мэдээлэл:
Гол-407,
Рашаан-37,
Нуур-92,
Булаг-482,
Худаг-285,
Усан сан-7.
Сэтгэгдэл (0)
Сэтгэгдэл бичигдээгүй байна