Мэргэжлийн сүмо бөхийн их аварга Тэрүнофүжи Г.Ган-Эрдэнэ бэртлийн улмаас зодог тайлах болсноо мэдэгдлээ. 33 настай түүний хувьд дээд зиндаанд нийт арван удаа түрүүлсэн бөгөөд удаан хугацааны бэртлийн дараа дэвжээнээ эргэн ирсэн боловч энэ оны Хацү башёгийн дөрөв дэх өдөр өвдөг шороодсоныхоо дараа үргэлжлүүлэн барилдах боломжгүй гэдгээ мэдэгджээ. Тэрбээр энэ удаагийн башёг хоёр даваа, гурван унаатай өндөрлүүлэв.
Ёкозүна Тэрүнофүжи 2015 оны Нацү башёд анхны түрүүгээ авч, 2015 оны Нагоя башёд шинээр Озеки цол хүртсэн.
Тэрбээр бэртлийн улмаас Жонидан хүртэл бууж 2019 оны Харү башёгаас 2021 оны Аки башё хүртэл амжилттай барилдаж Ёкозүна цол хүртсэн. Ёкозүна цолтой барилдсан эхний хоёр башёдаа дараалан түрүүлж байсан ба 2023 онд Монгол Улсын гавъяат тамирчин цол хүртсэн. 2024 оны Нагоя башёд 10 дахь түрүүгээ хүртэж хоёр оронтой буюу 10-аас дээш түрүүлсэн 15 дахь Ёкозүна болсон байна. Тэрбээр Япон улсын иргэн болсон гэдгээрээ зодог тайлсан хойно Исэгахама дэвжээг эзмших учиртай. Мөн ёкозүна цолтой бөх Японы иргэн болсон тав дахь тохиолдол. Анх ёкозүна Акэбоно АНУ-ын иргэншлээсээ татгалзаж, Японы иргэн болсон тул түүний араас Мүсашимарү, Хакүхо, Какүрюү зэрэг ёкозүна нар иргэншлээ сольжээ.
Сэтгэгдэл (0)
Сэтгэгдэл бичигдээгүй байна