АНУ-ын Олон улсын хөгжлийн агентлаг нийт 10 сая ам.доллар буюу 34 тэрбум төгрөгийн санхүүжилт бүхий шинэ хөтөлбөрөө ирэх 2025 оноос эхлүүлэхээр болжээ.
Тус агентлаг таван жилийн турш хэрэгжүүлсэн BEST хөтөлбөрийн амжилтандаа тулгуурлан Монгол Улсын эдийн засгийн өсөлтийн дэмжин, төрөлжүүлэх зорилгоор жижиг дунд бизнесийн эрчим хүчний хэмнэлт, байгаль орчны тогтвортой байдал, өрсөлдөх чадварыг нэмэгдүүлэх чиглэлд шинэ хөтөлбөрөө зориулах юм байна.
АНУ-аас Монгол Улсад суугаа Элчин сайд Ричард Буанган тус улсын Олон Улсын хөгжлийн агентлагиын BEST хөтөлбөр нь ирэх жилүүдэд Монголд жижиг бизнесүүд хөгжих хүчирхэг суурийг тавьсныг онцлоод “Бид Монголын хувийн хэвшилтэй цаашдаа ч хамтран ажиллаж, боломжуудыг бий болгож, урт хугацааны эдийн засгийн хөгжил цэцэглэлтэнд нь хувь нэмрээ оруулах болно гэдэгтээ итгэлтэй, бас баяртай байна” гэжээ.
BEST хөтөлбөр 2019 оноос эхлэн таван жилийн хугацаатай хэрэгжиж, манай улсын 5397 жижиг, дунд бизнесийн санхүүжилтийг нэмэгдүүлэх зорилгоор 100.4 сая ам.доллар буюу 329.7 тэрбум төгрөгийн зээл авч, 4000 гаруй ажлын байрыг шинээр бий болгоход дэмжлэг үзүүлсэн юм.
Шинэ хөтөлбөрийг сонирхож буй байгуулагууд www.grants.gov цахим хуудсанд 72043825RFA00001 дугаарын дагуу 2025 оны 2-р сарын 12-ны дотор саналаа ирүүлэхийг урьж байгаа аж.
Сэтгэгдэл (0)
Сэтгэгдэл бичигдээгүй байна