BEST ХӨТӨЛБӨР ЖДҮ ЭРХЛЭГЧДЭД 329.7 ТЭРБУМЫН ЗЭЭЛ АВАХ, 4000 АЖЛЫН БАЙР ШИНЭЭР БИЙ БОЛГОХОД ТУСАЛЖЭЭ

АНУ-ын Засгийн газраас тус улсын Олон улсын хөгжлийн агентлагаар (ОУХА) дамжуулан хэрэгжүүлсэн “Бизнесийн Тогтвортой Хөгжлийг Сайжруулах, Ил Тод Байдлыг Нэмэгдүүлэх”  BEST хөтөлбөр таван жилийн хугацаанд Монгол Улсын 5,397 жижиг, дунд бизнесийн санхүүжилтийг нэмэгдүүлэх зорилгоор 100.4 сая ам.доллар буюу 329.7 тэрбум төгрөгийн зээл авч, 4000 гаруй ажлын байрыг шинээр бий болгоход дэмжлэг үзүүлжээ.

2019 онд тус агентлагийн эхлүүлсэн 15 сая ам.долларын санхүүжилт бүхий BEST хөтөлбөрийн хүрээнд санхүүгийн удирдлага, маркетингийн чиглэлээр, үүний дотор зээлийн өргөдөл, бичиг баримт хэрхэн бүрдүүлэх зэрэг олон төрлийн сургалтууд бизнес эрхлэгчдэд зориулан явуулсан юм.

Тус хөтөлбөрийн голлох амжилтуудын нэг нь эмэгтэй хүн удирддаг болон хөдөө орон нутагт үйл ажиллагаа явуулдаг бизнесийг бэхжүүлэх явдал байв. ОУХА-ийн дэмжлэгээр олгосон нийт зээлийн талаас илүү хувийг эмэгтэй хүн удирдсан бизнест олгож, нийт 3,005 эмэгтэй бизнес эрхлэгчдийг чадавхижуулсан байна. 

Мөн хөтөлбөрийн хүрээнд хөдөө орон нутгийн 176 гарааны болон жижиг бизнес эрхлэгчдэд 500,000 ам.доллар буюу 1.7 тэрбум төгрөгийн буцалтгүй тусламж олгож, уг санхүүжилт нь аж ахуйн нэгжүүдэд шинэ тоног төхөөрөмж худалдан авах, шинэ ажлын байр бий болгох, орон нутагт эдийн засгийн идэвхжлийг нэмэгдүүлэхэд тусалжээ. Бизнес эрхлэгчдийн хамтын ажиллагааг идэвхжүүлж, орон нутгийн засаг захиргаатай хамтран бүс нутгийн хөгжлийн стратегийг боловсруулан батлуулж, цаашдаа жижиг дунд бизнест тогтвортой үр өгөөж хүртэхэд нь дэмжлэг үзүүлэх төрийн бус байгууллагуудыг үүсэн бий болоход нь Улаанбаатар хот болон 12 аймгийг хамарсан BEST төсөл том түлхэц болсон юм. 

АНУ-аас Монгол Улсад суугаа Элчин сайд Ричард Буанган хэлсэн үгэндээ АНУ-ын ОУХА-ийн BEST хөтөлбөр нь ирэх жилүүдэд Монголд жижиг бизнесүүд хөгжих хүчирхэг суурийг тавьсныг онцлоод "Бид Монголын хувийн хэвшилтэй цаашдаа ч хамтран ажиллаж, боломжуудыг бий болгож, урт хугацааны эдийн засгийн хөгжил цэцэглэлтэнд нь хувь нэмрээ оруулах болно гэдэгтээ итгэлтэй, бас баяртай байна” хэмээсэн байна.