Жижиг, дунд үйлдвэрийн газар, "Мишээл Экспо" ХХК болон Сөүл хотын "Дундэмүнг" дүүрэгтэй хамтран зохион байгуулж буй “Монголд үйлдвэрлэв-2024 БНСУ-д” үзэсгэлэн худалдааны нээлт боллоо.
Үндэсний үйлдвэрлэлийн бараа бүтээгдэхүүнийг БНСУ-ын зах зээлд сурталчлан таниулах, хоёр орны жижиг, дунд бизнес эрхлэгчдийн бизнесийн түншлэл, хамтын ажиллагааг өргөжүүлэх зорилготой тус үйл ажиллагаанд Жижиг, дунд үйлдвэрийн газрын дарга Я.Эрдэнэсайхан, Монгол Улсаас БНСУ-д суугаа Онц бөгөөд Бүрэн эрхт Элчин сайд С.Сүхболд, Үндэсний Ассамблейн гишүүн Хо Ын А болон Дундэмүн Дүүргийн иргэдийн Төлөөлөгчдийн хурлын дарга И Тэ Ин болон албаны бусад төлөөлөгчид оролцсон байна.
Элчин сайд С.Сүхболд арга хэмжээг нээж хэлсэн үгэндээ жижиг, дунд үйлдвэрлэл, гарааны бизнесийг амжилттай хөгжүүлж буй БНСУ-ын сайн туршлагаас суралцах, шилдэг технологи, менежментийг нутагшуулах, Солонгосын хэрэглэгчдэд ойртоход энэхүү үзэсгэлэн арга хэмжээ чухал хувь нэмэр оруулж ирснийг онцлон тэмдэглээд цаашид уг үйл ажиллагааг зохион байгуулахад ЭСЯ-ны зүгээс идэвхтэй дэмжинэ гэдгээ илэрхийлжээ.
Зургаа дахь удаагаа зохион байгуулж буй үзэсгэлэн худалдаа энэ сарын 16-ныг дуустал үргэлжлэх бөгөөд ноос, ноолууран бүтээгдэхүүн, үндэсний дээл хувцас, арьс ширэн бүтээгдэхүүн, өдөр тутмын хувцас, бэлэг дурсгал, эрүүл мэндийн бүтээгдэхүүн, хүнсний бүтээгдэхүүн, аялал жуулчлалын салбарын 20 аж ахуйн нэгж 400 гаруй нэр төрлийн бараа бүтээгдэхүүнээр оролцож байна.
Сэтгэгдэл (0)
Сэтгэгдэл бичигдээгүй байна