“МОНГОЛД ҮЙЛДВЭРЛЭВ -2024, ЕВРОПЫН ХОЛБООНД” арга хэмжээ Монгол Улсаас Бельгийн хаант улсад суугаа Элчин сайдын яамны дэмжлэгтэйгээр Бельги улсын Брюссель хотноо амжилттай зохион байгуулагджээ.
Тус арга хэмжээний хүрээнд манай Жижиг дунд үйлдвэрлэл эрхлэгчдийн төлөөлөл Брюссель дэх Элчин сайдын яамнаас зохион байгуулсан бизнес уулзалтад оролцож, Бельгийн ноос, нэхмэл, хувцас загвар, бусад салбарын жижиг дунд үйлдвэрлэгчдийн төлөөлөгчидтэй мэдээлэл солилцож, туршлага хуваалцсан байна. Бизнес уулзалтыг нээж Элчин Сайд Л.Болд болон Европын Парламентын гишүүн асан н.Иштван Ехели нар хүрэлцэн ирсэн жижиг дунд үйлдвэр эрхлэгчдэд амжилт хүсэж үг хэлсэн аж.
Мөн арга хэмжээний хүрээнд манай төлөөлөгчид Европын Холбооны Жижиг дунд үйлдвэрлэгчдийн холбоо /SME United/-нд зочилж, Байгууллагын бодлого, хуулийн асуудал хариуцсан захирал х.София Закаритай албан уулзалт хийжээ.
Уулзалтаар Монголын талаас үндэсний бараа, бүтээгдэхүүнийг Европын зах зээлд таниулах, хөрөнгө оруулагч татах, жижиг, дунд үйлдвэрлэгчдийн туршлага судлах боломжийн талаар харилцан санал солилцлоо. Цаашид дээрх асуудлын хүрээнд Европын орнуудад хамтарсан төсөл, хөтөлбөр хэрэгжүүлэх, сургалт хийх замаар хамтын ажиллагааг өргөжүүлэхээр тохирчээ.
Европын 30 гаруй орны 70 орчим гишүүн байгууллагатай, гар урлал, жижиг дунд үйлдвэрлэл эрхлэгчдийн холбоо болох Европын Холбооны Жижиг дунд үйлдвэрлэгчдийн холбоо нь ажил олгогчдод хүлээн зөвшөөрөгдсөн байгууллага юм. Тус холбоо нийт 22.5 сая жижиг дунд үйлдвэрлэл эрхлэгчдийн ашиг сонирхлыг Европ болон олон улсын түвшинд стандартчиллын үйл явцад төлөөлж, хамгаалдаг байна.
Монгол Улсын жижиг дунд үйлдвэрлэл эрхлэгчдийн төлөөлөл мөн БЕНЕЛЮКС дэх Монголын Бизнес консулын удирдлагуудтай уулзаж өөрсдийн бараа, бүтээгдэхүүнийг Европын зах зээлд гаргах, таниулах боломжуудын талаар санал бодлоо солилцож, цаашид хамтран ажиллахаар тохирчээ.
Сэтгэгдэл (0)
Сэтгэгдэл бичигдээгүй байна