ҮНДЭСНИЙ БАРАА БҮТЭЭГДЭХҮҮНИЙГ ЕВРОПЫН ЗАХ ЗЭЭЛД ТАНИУЛАХ, ЭКСПОРТЛОХ ТАЛААР ЯРИЛЦЖЭЭ

“МОНГОЛД ҮЙЛДВЭРЛЭВ -2024, ЕВРОПЫН ХОЛБООНД” арга хэмжээ Монгол Улсаас Бельгийн хаант улсад суугаа Элчин сайдын яамны дэмжлэгтэйгээр Бельги улсын Брюссель хотноо амжилттай зохион байгуулагджээ. 

Арга хэмжээний хүрээнд Европын Холбооны Жижиг дунд үйлдвэрлэгчдийн холбоо /SME United/-нд зочилж, Байгууллагын бодлого, хуулийн асуудал хариуцсан захирал х.София Закаритай албан уулзалт хийсэн байна. 

Уулзалтад Брюссель дэх Элчин сайдын яамны Худалдаа эдийн засгийн асуудал хариуцсан Нэгдүгээр нарийн бичгийн дарга Б.Төмөрбат, Жижиг, дунд үйлдвэрийн газрын ахлах мэргэжилтэн Ж.Амаржаргал, Мишээл Экспо ХХК-ийн ахлах менежер З.Одонтуяа, жижиг, дунд үйлдвэр эрхлэгчдийн төлөөлөл, Бельги дэх ЭСЯ-ны дэргэдэх Монголын Бизнес Консул ТББ-ын ерөнхийлөгч Ц.Адьяа, нарийн бичгийн дарга Н.Төмөр-очир болон албаны бусад хүн оролцжээ. 

Арга хэмжээний эхэнд Байгууллагын бодлого, хуулийн асуудал хариуцсан захирал х.София Закари Европын Холбооны Жижиг дунд үйлдвэрлэлийн холбооны бодлого, үйл ажиллагааны талаар танилцуулж, хэрэгжиж буй төсөл хөтөлбөрийн талаар дэлгэрэнгүй мэдээлэл өгсөн байна. Түүнчлэн Монгол Улсын Жижиг, дунд үйлдвэрийн газартай дээрх асуудлын хүрээнд Европын орнуудад төсөл, хөтөлбөр хэрэгжүүлэх, сургалт хийх замаар хамтын ажиллагааг өргөжүүлэхээр тохиров.

Монголын талаас үндэсний бараа, бүтээгдэхүүнийг Европын зах зээлд таниулах, экспортлох боломж, хөрөнгө оруулагч татах, жижиг, дунд үйлдвэр эрхлэгчдийн туршлага судлах боломжийн талаар харилцан санал солилцлоо. Цаашид дээрх асуудлын хүрээнд Европын бусад орнуудад Монголын Бизнес Консулаар дамжуулан хамтын ажиллагааг өргөжүүлэхээр тохиров.

Европын Холбооны Жижиг дунд үйлдвэрлэгчдийн холбоо нь 30 гаруй орны 70 орчим гишүүн байгууллагатай, гар урлал, ЖДҮ эрхлэгчдийн холбоо юм. Ажил олгогчдод хүлээн зөвшөөрөгдсөн тус байгууллага нь Европ дахь 22,5 сая ЖДҮ эрхлэгчдийг Европын холбоонд төлөөлдөг аж. Мөн Европын болон олон улсын түвшинд стандартчиллын үйл явцад жижиг дунд үйлдвэрлэгчдийн ашиг сонирхлыг төлөөлж, хамгаалдаг байна.

Тус холбоо нь Европын байгууллагууд, бусад оролцогч талууд болон Нийгмийн яриа хэлэлцээнд жижиг дунд үйлдвэрлэгчдийн сонирхлыг илэрхийлэх, сүлжээ, чадавхийг бэхжүүлэх, төслүүдэд төлөөлөх гэсэн үндсэн гурван үүрэгт анхаарч ажилладаг байна.