КАРЛСЕН: САЛАХТАЙ ШАТАР ДУРТАЙЯА НҮҮНЭ ШҮҮ...

Дэлхийн шатрын аварга, Норвегийн цэл залуухан их мастер Магнус Карлсен 1 сая ам.долларын шагналын сантай тэмцээнд оролцохоор Их Британийн нийслэл Лондонд ирээд байгаа ажээ.

Шатрын ертөнцийн хамгийн том хүн ирсэнийг далимдуулаад Английн сэтгүүлчид Премьер лигийн хөлбөмбөгчидтэй, жишээлбэл “Ливерпүүл”-ийн Мохамед Салахтай ганц ч болтугай өрөг нүүх эсэхийг лавлажээ. Карлсен бол хөлбөмбөгт дуртай, “Реал Мадрид”-ын үнэнч фанатын хувьд хөлбөмбөгчидтэй шатар нүүх саналыг тун дуртайяа хүлээн авна гэдгээ хэлсэн байна.

“Тийм боломж олдвол би дуртайяа нүүнэ шүү. Хөлбөмбөгт дурлагчийн хувьд Салахтай тогло гэвэл сонирхолтой сайхан байх болно” гэж гэсэн байна. Салахын нэг багийн залуу Трент Александер-Арнольдтой 2018 онд Карлсен нэг өрөг наадахдаа 17 нүүгээд мадлачихсан юм. Ердөө 5 минутын энэ тулаанаас Карлсен огт өрсөлдөөний амт мэдрээгүй. Гэхдээ Премьер лигийн хөлбөмбөгчдийн дотор давгүй нүүчихдэг ч түүнийгээ зарлаж ярьдаггүй нэг хүн байдаг гэнэ. Тэр нь “Арсенал”-ын ахлагч, Карлсений нутаг нэгт Мартин Одегар ажээ. “Одегар уг нь тоглодог юм. Гэхдээ сүүлийн үед нэг их нүүгээгүй байх. Муугүй шатарчин шүү. Хөлбөмбөгчдөөс өөр хэн хэн тоглодгийг би сайн мэдэхгүй. Гайгүй нүүдэг хүн байна уу?” хэмээн сөргүүлэн асуужээ.

Яагаад Салахын тухай яриа гэнэт гарав гэвэл египет довтлогч өөрөө л “Миний чансаа 1400 оноо давсан байдаг юм. Мэдээж, би Магнус биш л дээ. Гэхдээ өөртөө бол тоглочихно. Магнустай тоглох боломж олдоно гэж найддаг” хэмээн ярьсан ажээ.

Сонирхолтой нь “Челси”-гийн дасгалжуулагч Энцо Мареска “шатар хэрхэн хөлбөмбөгийн дасгалжуулагчийн оюун ухаанд тусалж болдог вэ?” гэх сэдвээр диссертаци бичсэн хүн гэнэ. Тэгэхээр нүүдэг л байж таарах нь.

Магнус Карлсен хөлбөмбөгийн фантази тоглох дуртай. Премьер лигийн фантазид 2020 онд 7.3 сая хүн оролцоход хэсэг хугацаанд Дэлхийд тэргүүлж явсан юм. Гэвч эцсийн дүндээ Дэлхийд 10-т орж дууссан. Дэлхийд 10-т орно гэдэг бол лут том амжилт л даа. Одоо фантази тоглож буй эсэхийг нь асуухад “Аймшигтай аймшигтай. Манай багт Холанд байхгүй юм чинь. Сүүлийн үед ер нь сулраад байна шүү” хэмээн хариулжээ.

Магнусаас өөрийгөө Дэлхийн шатрын түүхэн дэх хамгийн аугаа нь гэж боддог эсэхийг асуухад “Үгүй дээ, Гарри урьдын адил миний өмнө байгаа. Бас Бобби Фишер байна. Гэхдээ миний нэр бас дурдагдах байх гэж найддаг” гэжээ. Гарри гэж Дэлхийн шатрын 13 дахь аварга Гарри Каспаровыг хэлж буй хэрэг.