​ЖИЖИГ, ДУНД ҮЙЛДВЭР ЭРХЛЭГЧИД ФРАНЦААС ТУРШЛАГА СУДАЛЖЭЭ

Жижиг, дунд үйлдвэрийн газраас Мишээл экспо төвтэй хамтран үндэсний үйлдвэрийн бараа бүтээгдэхүүнийг экспортлох боломж нөхцөлүүдийг нэмэгдүүлэх, бизнесийн харилцан түншлэлийг өргөтгөх, шинэ зах зээл нээх, хамтран ажиллах зорилгоор “Монголд үйлдвэрлэв-2024, Европын холбоонд” арга хэмжээг Парис хотноо амжилттай зохион байгуулжээ.

Жижиг, дунд үйлдвэрийн газрын ахлах мэргэжилтэн Ж.Амаржаргал, Мишээл Экспо ХХК-ийн ахлах менежер З.Одонтуяа нараар ахлуулсан манай жижиг дунд үйлдвэр эрхлэгчдийн төлөөллийг  Францын Аж ахуйн нэгжүүдийн нэгдсэн хөдөлгөөн/MEDEF/-ий дэд захирал Жеральдин Лөбмлэ Парис хотноо 2024 оны аравдугаар сарын 2-нд хүлээн авч уулзсан байна. Тэрбээр тус улсын 190 мянган аж ахуйн нэгжийг нэгтгэдэг өөрийн байгууллагын үйл ажиллагаа, хамтын ажиллагааны боломжуудыг танилцуулж, энэ сарын сүүлээр тус байгууллагын дэргэдэх Франц, Монголын бизнес зөвлөлөөс францын ажил хэрэгч хүмүүсийн айлчлалыг Монгол Улсад зохион байгуулах гэж буй талаар мэдэгджээ. 

Төлөөлөгчид хоёр орны жижиг, дунд бизнес эрхлэгчдийн эдийн засаг, худалдааны харилцаа, хамтын ажиллагааг идэвхжүүлэх боломжийн талаар харилцан санал солилцсон байна. Мөн ирэх сард Монгол Улсад зочлох МЕDEF -ийн төлөөлөгчид, гишүүн байгууллагуудын төлөөлөлтэй уулзах, харилцан туршлага солилцох боломжийн талаар дэлгэрэнгүй ярилцжээ.

Дашрамд дуулгахад, МЕDEF 1998 онд байгуулагдсан бөгөөд 1946 онд үүссэн Францын Ажил олгогчдын үндэсний зөвлөл /ФХЭҮЗ/-ийн үйл ажиллагааг үргэлжлүүлж буй холбоо юм. Тус байгууллага нийт 190,000 гаруй гишүүнтэй, тэдгээрийн 70 орчим хувь нь жижиг, дунд бизнес эрхлэгчид байдаг аж. 

Манай төлөөлөгчдийг мөн Францын төрийн “BPIFrance” банкны Азийн бүсийн менежер хатагтай Элоди Барриа, Экспортын санхүүжилтийн газрын зөвлөх ноён Хюго Пүлё нар хүлээн авч уулзан, үндэсний экспортыг дэмжих чиглэлээр тус банкнаас олгодог санхүүжилт, хөрөнгө оруулалт, даатгалын үйлчилгээний талаар танилцуулжээ.  “BPIFrance” банк 3200 ажилтантай ба Францад 50 салбартай, олон улсад 11 салбартай 52 тэрбум еврогийн өөрийн хөрөнгөтэй төрийн банк юм.