“БАЙЕРН”-“РЕАЛ МАДРИД”. ТОГЛОЛТЫН ӨМНӨ ХЭН ЮУ ХЭЛЭВ?

Европын хөлбөмбөгийн энэ улирал төгсгөл рүүгээ дөхөж, шигшигдсэн хэдхэн баг аваргын төлөө өрсөлдөхөөр шалгараад байна.

Аваргуудын лигийн шөвгийн дөрөвт өнөө шөнө Германы “Байерн Мюнхен” талбайдаа Испанийн “Реал Мадрид”-ыг хүлээн авах болно. Хоёр багийн түүхэн өрсөлдөөний дүн ойролцоо. Өмнөх шатанд хоёулаа Английн клубыг ялж гарч ирсэн. “Арсенал”-ыг “Байерн”, “Манчестер Сити”-г “Реал Мадрид” буулган авснаар хоорондоо тулахаар болсон.

Тоглолтын өмнөх хэвлэлийн бага хурал дээр Мадридын клубын итали дасгалжуулагч Карло Анчелотти “Энд ирсэндээ бид жаргалтай байна. Энэ танхимд суугаа олон хүн биднийг өдий хүртэл явна гэж бодоогүй байх.

Бид өөрсдөдөө итгэдэг. Хожиж чадна гэдгээ мэддэг. Гэхдээ “Байерн”-д хүндэтгэлтэй хандалгүй яахав. Магадгүй тэдний хувьд улирал хүссэнээр нь болохгүй байгаа байж мэднэ. Гэхдээ урьдын адил аюултай өрсөлдөгч хэвээрээ. Премьер лигийг тэргүүлж яваа “Арсенал”-тай тэд маш сайн тоглож, хожсон. Та бүхэн мөн “Реал Мадрид”-ыг хэзээ ч дутуу үнэлэх хэрэггүй шүү.

Өнгөрснийг өнгөрсөнд нь үлдээж, одоог одоогоор нь хүлээн авах хэрэгтэй. Энэ бол шөвгийн дөрвийн тоглолт. Маш хүчтэй, чанартай өрсөлдөгчтэй бид тулах гэж байна” хэмээн өгүүлжээ.

Тэгвэл Мюнхений клубын герман дасгалжуулагч Томас Тухель “Бид домогт клубтэй тоглох гэж байна. Тийм ээ, бид тэднээс нэг хоногоор дутуу бэлтгэл хийсэн. Гэвч бүгдээрээ тоглолт эхлэхийг тэсэн ядан хүлээж байгаа. Дарамт бол үргэлж байдаг. Үүнд анхаарах хэрэггүй. Харин ч чөлөөтэй мөн сахилга баттай байх ёстой.

Анчелотти бол домог болсон хөлбөмбөгч мөн дасгалжуулагч. Тэгсэн хэрнээ маш даруухан, эелдэг хүн. Үргэлж тайван байдаг, маш их туршлагатай, хөлбөмбөгчдийнхөө аав шиг л байдаг мундаг зан чанартай л даа.

Де Лигт болон Лаймерийн гэмтлийн талаар яг одоо би 100 хувь итгэлтэй хэлчих мэдээлэлгүй байна. Де Лигт, Упамеканог бодвол Лаймерийн гэмтэл арай хөнгөн болов уу. Хэдэн цагийн дараагаар  илүү тодорхой мэдээлэл ирэх ёстой.

Бэллингэм бол онцгой тоглогч. Энэ улирлын үзүүлэлт нь түүний зан чанарын илрэл юм. “Реал Мадрид”-ын хөлбөмбөгч болно гэдэг өөрөө маш том дарамтыг даах тушаал авлаа гэсэн үг. Гэвч Бэллингэмийг харахад ямар ч дарамт байхгүй юм шиг л байна. Ийм тоглогчийн эсрэг бид яаж тогловол дээр вэ гэдэг дээр ажиллах болно. Түүнээс гадна мөн Винисиус байна. “Челси”-д байхад минь гоолоороо намайг мулталсан Родриго байна. Тэд бүгдээрээ багийнхаа чухал тоглогчид.

Тийм ээ, би Гнабриг энэ удаад гоол оруулна гээд хэлчихсэн. Оруулах л болно. Яагаад тэгж бодоод байгаагаа тайлбарлаж чадахгүй нь. Гэхдээ яг тийм юм болно гэдэгт бол итгэлтэй байна” хэмээн Тухель өгүүлжээ.

Тоглолт Улаанбаатарын цагаар 03:00-д Мюнхен хотын “Альянц Арена”-д эхлэх болно.