Маргааш Английн шигшээ баг Бельгитэй нөхөрсөг тоглолт хийх ёстой. Гурван арслангийн гол довтлогч Харри Кейн гэмтэлтэй шалтгаанаар Бразилтай ч тоглолгүйгээр Германы “Байерн Мюнхен” рүү тэр даруй буцсан.
Ингээд Бразилтай тоглоход довтолгоонд Энтони Гордон, Олли Уоткинс нарыг гаргасан ч Английн шигшээ гоол оруулж чадалгүй 0:1-ээр хожигдсон юм. Тэгвэл тухайн тоглолтод сэлгээнд суугаад дуусгасан “Брэнтфорд”-ын довтлогч Айвен Тоуни Бельгитэй хийх тоглолтод гараанд гарна гэдгийг дасгалжуулагч Гарет Саутгэйт зарлалаа.
Тоуни өнгөрсөн ДАШТ-д өөрийг нь авч яваагүй талаар хэд хэдэн удаа ярилцлагадаа дурдаж, бухимдаж гомдохын дундуур байр сууриа илэрхийлсэн. Тэгвэл одоо Европын АШТ-ий өмнөхөн түүнд шигшээ багт үнэхээр хэрэгтэй тоглогч гэдгээ харуулах алтан боломж олдож байгааг Саутгэйт онцлон дурджээ.
“Маш том боломж гэдгийг тэр өөрөө ойлгож байгаа. Үүнийг үгүйсгэе гэсэн ч үгүйсгэж чадахгүй. Шигшээ багтаа гараанд анх удаа гарна. Үүнийгээ л бодох ёстой. Тоуни бол өөртөө их итгэлтэй залуу. Клубынхээ төлөө дараалан хэд хэдэн тоглолтод маш сайн тоглочихоод ирлээ. Тиймээс энэ тоглолтод бүрэн бэлэн байна гэдэгт нь эргэлзэх хэрэггүй” хэмээн Саутгэйт өгүүлжээ.
Айвен Тоуни хөлбөмбөгийн тоглолтод мөрий тавьсан хэргийн улмаас олон сар тоглох эрхээ хасуулаад өнгөрсөн өвөл шийтгэлийн хугацаа нь дуусч талбайдаа гарсан билээ.
Английн шигшээгийн талаар өөр нэгэн мэдээ дуулгахад Харри Магуайр, Кайл Уолкер нар гэмтсэн учир клуб рүүгээ буцжээ.
Сэтгэгдэл (0)
Сэтгэгдэл бичигдээгүй байна