“САЛАХГҮЙГЭЭР ЧИ НЭГ Ч ЦОМ ӨРГӨХГҮЙ БАЙСАН ШҮҮ, КЛОПП ОО!”

Өнгөрсөн бямбө гаригт “Вест Хэм”-“Ливерпүүл” 2:2-оор тэнцээд ирэх үед Юрген Клопп гурван давхар сэлгээ хийхээр талбайн хажууд гурван тоглогчоо зогсоосон. Гэвч ямар нэгэн шалтгааны улмаас Салах руу үг хаяж, египет довтлогч хариуд нь эгдүүцлээ илэрхийлж, Дарвин Нуньес дундуур нь орж байж тайвшруулах дүр зургийг Дэлхий даяараа харсан билээ.

Тэгвэл цагтаа Английн шигшээ болон “Астон Вилла”-д тоглож явсан Габриэл Агбонлахор энэ тал дээр өөрийн байр сууриа илэрхийлжээ. Юрген Клопп энэ улирлыг дуусгаад багаа орхиж явахаар болсноо хэдэн сарын өмнө зарласан бол Мохамед Салахын “Ливерпүүл”-тэй байгуулсан гэрээ дуусгавар болоход дахиад нэг жил байгааг хөлбөмбөгийн хорхойтон танд сануулахад илүүдэх биз ээ.

“Салах тэгэлгүй яахав дээ. Тэр ямар сэлгээний тоглогч биш. Жаахан амраая гэвэл л Салахыг сэлгээнд түр суулгаж болно. Энэ клубын төлөө 210 гоол оруулж, 86 гоолын дамжуулалт тэмдэглүүлсэн хүн шүү дээ.

Гэтэл “Вест Хэм”-тэй хийсэн шиг хүнд тоглолтод түүнд ердөө 12 минут өглөө. “12-хон минут уу тэ! Би чинь Салах шүү дээ. Надгүйгээр чи нэг ч цом өргөхгүй байх байсан шүү” гэж хэлсэн байж магадгүй. Ер нь Салахгүй бол “Ливерпүүл” цомгүй л байх байсан. Энэ клубын төлөө гайхамшигтай сайн тоглосон хүн. Гэтэл хүндлэл хаачив?

Одоо Клопп явахаасаа өмнө “Ливерпүүл”-ийн үлдэж буй бүрэлдэхүүнд бөөн асуудал, бэрхшээл үүсгэх нь. Салахыг явахаар болж байгаа ч гэж ярих боллоо. Сая болоод өнгөрсөн явдал Салахын явах эсэхэд нөлөөлөх болов уу?

Та нар уг нь аваргын төлөө тэмцэж байгаа бол хожил хэрэгтэй биз дээ? Тэгсэн хэрнээ хамгийн том тоглогчдоо 12-хон минут өгдөг. Тиймээс Салахыг эгдүүцлээ илэрхийллээ гэж хариу эгдүүцэх хэрэггүй. Миний бодлоор Клопп багийн хяналтаа алдаж, буруу шийдвэр гаргасан” хэмээн Агбонлахор өгүүлжээ.

Мохамед Салах тухайн тоглолтын дараагаар сэтгүүлчдийн бүсийн хажуугаар өнгөрөхдөө “Өнөөдөр би үг хэлбэл гал гарна” гэж хэлснийг олон хэвлэл дурдсан билээ.