Улсын Онцгой комиссоос шар усны үер болон ой хээрийн түймрээс сэрэмжлүүлж, мэдээлэл хийлээ.
Цасан бүрхүүлийн хэмжээ нийт нутгаар багасаж байгаа ч томоохон голын хөндий, ай сав гараар 75-95 хувийн цасан бүрхүүлтэй байна.
Цас мөсөнд агуулагдах усны хэмжээ их, цаг агаар дулаарч байгаатай холбоотой голуудын сав нутгаар шар усны үерийн эрсдэл өндөр байгааг энэ үеэр анхааруулав. Сэлбэ, Санзай орчимд мөсөн дээгүүрээ устай, мөсний үзэгдлийн нөлөөтэй түвшинтэй, Сэлбэ, Дамба харуул дээр усны түвшин 131 см буюу үерийн түвшинд, мөсний үзэгдэл байхгүй чөлөөтэй урсаж байна гэж мэдээлэлд дурдлаа.
Нийслэлийн хэмжээнд гуравдугаар сарын 10-ны үеэс шар усны үерийн дуудлага ирж эхэлж, өнөөдрийг хүртэл 110 удаагийн шар усны үерийн дуудлагаар Онцгой байдлын байгууллагын алба хаагчид ажиллалаа. Зөвшөөрөлгүй үерийн аманд буусан 388, зөвшөөрөлтэй ч эрсдэлтэй 1487 бүсэд айл байгаа бөгөөд нүүх шаардлагыг тавьсаар байгааг мөн дурдсан. Ойрын өдрүүдэд шөнөдөө нэмэх градус руу орж дулаарах төлөвтэй байгаатай холбоотойгоор шар усны үерийн эрсдэл нэмэгдэж байгааг анхааруулав.
Өнгөрсөн шөнө зарим газарт голын усны түвшин дээшилсэн талаар иргэд болгоомжилсон байдалтай байлаа, энэ бол бидний онцгой анхаарч байгаа байршлын нэг. Барилга байгууламж буулгах ажлыг энэ оны хоёрдугаар сарын 15-наас хийгээд явж байна гэж мэдээллээ.
Түүнчлэн сүүлийн хэдхэн хоногт зургаан аймгийн 10 суманд 12 удаагийн ой хээрийн түймэр гарсан. Тиймээс хаврын хуурайшилттай нөхцөлд онцгой анхааралтай байхыг ОБЕГ-ын Гал түймэртэй тэмцэх газрын дарга, хурандаа Ц.Нямбаяр анхааруулсан юм.
Дөрөвдүгээр сарын 1-ний байдлаар, нэг аймгийн нэг сум төмөр зудын, зургаан аймгийн 17 сум цагаан зудтай, долоон аймгийн 13 сум, нийслэлийн нэг дүүрэг цагаанаар зудархуу нөхцөл байдалд байна. Нийт малын хорогдол 6.3 саяд хүрчээ.
Сэтгэгдэл (0)
Сэтгэгдэл бичигдээгүй байна