ХАБИ АЛОНСО: МИНИЙ ЭНДЭХ АЖИЛ ДУУСААГҮЙ БАЙНА

Испани дасгалжуулагч Хаби Алонсог Германы “Байер Леверкузен”-ээс ирэх зун явах эсэх тухай ярианд төгсгөл тавилаа. Хаби Алонсог үлдэнэ гэдгийг Хаби Алонсо өөрөө мэдэгдсэн тул энэ талаар дахин ярих утгагүй болсон юм.

Сануулахад, Хаби Алонсо өнгөрсөн улирлын эхээр буюу 2022 оны аравдугаар сард “Байер”-ийг Бундеслигийн 16 дугаар байрт явахад нь дасгалжуулагчаар очсон. Харин энэ улиралд түүний баг нэг ч хожигдолгүйгээр гайхуулан шагшуулж байгаа билээ. 
Тиймээс ч дасгалжуулагч нь ирэх зун багаа орхих тухайгаа зарласан Английн “Ливерпүүл”, Германы “Байерн Мюнхен” зэрэг клубүүд Хаби Алонсогийн араас хөөцөлдсөн юм. Хоёр багт хоёуланд нь тоглож явсан болохоор хоёуланд нь боломж байж болох байлаа. Гэвч Хаби Алонсо Леверкузен дэх ажлаа дуусгаагүй байна гээд үлдэхээр болжээ.
“Өнгөрсөн долоо хоногт би Симон Рольфес болон Фернандо Карро нартай сайн ярилцсан. Тэр ярианыхаа үеэр “Байер”-т ирэх улиралд үлдэж ажиллана гэдгээ хэлсэн. Энд байх нь миний хувьд хамгийн тохиромжтой санагдаж байгаа. Шинэ, залуу дасгалжуулагчийн хувьд эндээ ажиллах нь зөв гэж бодсон.
Тэгээд ч эндэх миний ажил дуусаагүй байна. Клубдээ тусалж, хөлбөмбөгчдийн хөгжил дэвжилтэд нэмэр болохыг хүснэ. Клубын удирдлага гээд эндэхийн бүх юм гайхамшигтай сайхан. Залуу дасгалжуулагч болохоор үлдэж ажиллах нь ирээдүйд минь илүү зөв зам. Яарч хөдлөлгүйгээр эндээ ажиллах нь зөв гэдэгт итгэлтэй байна.
Өөр бусад клубүүдийн сонирхол, саналын талаар ярих нь буруу болох болов уу гэж бодож байна. Эндээ аятай таатай ажиллаж байгаа минь л миний хувьд чухал юм. Манай баг цаашид улам өсөн дэвжихийг хичээж байгаа. Мэдээж, энэ улирал үнэхээр сайхан өрнөж байна. Гэхдээ бид оролцож буй бүх тэмцээндээ хамгийн өндөр зорилго тавьсан.
Багийнхаа үндэс суурийг авч үлдээд, ирээдүйгээ тооцон ажиллах болно. Бидний хувьд хамгийн ойрын тоглолтууд хамгийн чухал. Багийнхандаа гаргасан шийдвэрээ дуулгасан. Жирийн л нэг өдрийн бэлтгэл дээр багийнхандаа хэлсэн. Одоо энэ хэвлэлийн бага хурлын дараагаар энэ сэдвээр дахин ярилгүйгээр ажилдаа л анхааръя. Манай хөлбөмбөгчид явах эсэх тухай цуу яриа гарах бүрийд зөв хүлээн авч, зөв хандаж байлаа” хэмээн Хаби Алонсо өгүүлсэн байна.