ИЗНН-ын дарга Б.Батбаатар өнөөдөр /2024.03.11/ мэдээлэл хийж, улс төрийн 35 нам эвсэх боломжийн эсрэг энэ Сонгуулийн хуулийг баталсан байна. Хуульд маш олон заалтыг эвсэл, нэгдлийн эсрэг суулгаж өгсөн байна гэж мэдэгдэв.
Тухайлбал, УИХ-ын Сонгуулийн тухай хуулийн 74.2-т дараах шаардлагыг хангасан нам, эвсэлд энэ хуульд заасны дагуу суудал хуваарилна гэж заасан.
• Тухайн намд өгсөн нийт саналын дөрөв буюу түүнээс дээш хувийн санал авсан байх
• Хоёр нам бүхий эвсэл байвал 5 хувийн санал
• Гурав буюу түүнээс дээш нам эвссэн бол сонгогчдоос 7 хувийн санал авсан байх гэж заажээ.
2020 оны УИХ-ын сонгуулиар 1,475,000 сонгогч санал өгсөн. Одоо 1.6 сая сонгогч санал өглөө гэж тооцоход бид дангаараа ороход нийт сонгогчдын 4 хувийн санал авна гэж тооцож, эрх баригчид хуулиа баталсан. Үүний 4 хувь буюу 64 мянган иргэний саналаар УИХ-д суудалтай болно гэж заасан.
Хоёр нам эвсэхэд 80 мянга, гурван нам эвсэхэд 112 мянган сонгогчийн саналаар УИХ-д суудалтай болох заалтыг оруулсан. Гэвч бид эвсэж нэгдэхийн төлөө тууштай ажиллах болно. Бусад намуудын удирдлагууд ч эвсэж, нэгдэхийн төлөө ажиллаж байна. Гуравдугаар сарын 22-24-ний өдөр улс төрийн намууд сонгуульд дангаараа, эсвэл эвсэж нэгдэж орох эсэхээ тогтож, Сонгуулийн мөрийн хөтөлбөрөө Үндэсний аудитын газарт хүргэх хуулийн зохицуулалттай. Энэ хугацаанаас өмнө эвслүүд зохион байгуулагдаж, хурлуудаа хийж, гэрээ, мөрийн хөтөлбөрөө баталж, эвслээ байгуулах шаардлага тулгарч байна. Намууд эвсэлд нэгдэнэ гэдэгт итгэж байна. 35 нам эвсэж, нэгдэж чадвал Монголд жинхэнэ хувьсгал болно гэж мэдэгдлээ.
ИЗНН-ын дарга Б.Батбаатар МАН, АН-аас бусад улс төрийн 35 нам нэгдэхийг гуйсан саналаа 2024 оны 2 дугаар сарын 5-ны өдөр гаргаж, намуудын дарга, удирдлагуудад өөрийн хүсэлтийг хүргэж өгсөн юм.
Сэтгэгдэл (0)
Сэтгэгдэл бичигдээгүй байна