Монголчуудын соёлын үнэт өв, бусдаас ялгарах ондоошил бол “Угийн бичиг” буюу хүн өөрийн удам судраа мэдэж, гэр бүлийн түүхээ бичих, түүнийгээ үеэс үед үр хүүхдүүддээ өвлүүлэх ухаан. Угийн бичиг гэдэг нь есөн үеэр шувтардаг ясан төрөл буюу эцгийн талаа бүрэн хөтөлсөн удам угсааны бичиг юм.
“Угийн бичиг”-ээ хөтлөх нь удам угсаагаа цэвэр ариун байлгах, цус ойртох, Монгол хүний удмын санд сөргөөр нөлөөлөхөөс урьдчилан сэргийлэх чухал ач холбогдолтой, гэр бүлийн боловсролыг угийн бичгээр дамжуулан олгох боломжтойг таниулж яваа төрийн бус байгууллага бол "Уг удам, өв соёл" холбоо.
Угийн бичиг, өв соёлоо түгээн дэлгэрүүлэх чиглэлээр үйл ажиллагаа явуулдаг "Уг удам, өв соёл" төрийн бус байгууллагаас 21 аймаг, нийслэл, дүүргийн салбар зөвлөлийнхнөө хамруулсан чуулга уулзалтаа Төв аймагт зохион байгууллаа.
Төв аймгийн ЗДТГ, Зуунмод хотын ЗДТГ, Улсын бүртгэлийн хэлтэс, Төв аймгийн Хүүхэд, гэр бүлийн хөгжил, хамгааллын газар, “Уг Удам өв соёл холбоо” хамтран зохион байгуулсан тус чуулганаар өв соёлыг түгээн дэлгэрүүлэх, сурталчлан таниулах чиг үүргийн дор нэгдсэн "Уг удам, өв соёл" холбооны тэргүүнүүд сүүлийн таван жилд хийж хэрэгжүүлсэн ажлуудын үр дүнгийн талаар хэлэлцэн, харилцан туршлага солилцжээ.
Сэтгэгдэл (0)
Сэтгэгдэл бичигдээгүй байна