Дуурь бүжгийн эрдмийн театр 2025 оны нэгдүгээр сарын 25 - 26-нд В.А.Моцартын хамгийн сүүлийн сонгодог бүтээл болох “Увдист лимбэ” дуурь тоглогдоно. Хоёр бүлэг, 11 үзэгдэлтэй тус дуурийн анхны тоглолт 1791 оны 09 дүгээр сарын 30-нд Вена хотын Ауф дер Виден театрт болж байжээ.
“Увдист лимбэ” дуурь тайзнаа тавигдсан даруйдаа асар их амжилтад хүрсэн байдаг. Анхны тоглолтоосоо сарын дараа гэхэд л 20 удаа тоглогдож амжжээ. Тэр үед Моцартын амьдралын сүүлчийн өдрүүд байсан бөгөөд уран бүтээлчийн хувьд аз жаргалаар дүүрэн байсан. Учир нь өдөр өдрөөр нэн их амжилт, хүндэтгэл бишрэл дагуулсан энэ дууриасаа маш их таашаал авдаг байсан тухайгаа суут хөгжмийн зохиолч тэмдэглэсэн нь бий. Тэрбээр бараг өдөр бүр “Увдист лимбэ”-ийг сонсохоор театрт очдог байсан гэдэг. Харамсалтай нь түүний энэ баяр баясгалан удаан үргэлжлээгүй. Тэрбээр үүнээс хоёрхон сарын дараа буюу 1791 оны 12 дугаар сарын 05-нд ертөнцийн мөнх бусыг үзүүлсэн билээ.
Тус дуурь ДБЭТ-ын ерөнхий найруулагч Г.Эрдэнэбаатарын шинэчилсэн найруулгаар үзэгчдийн хүртээл болох юм.
Сэтгэгдэл (1)