Улсын дээд шүүхийн Эрүүгийн хэргийн танхимын нийт шүүгчийн 2024 оны дөрөвдүгээр сарын 17-ны өдрийн хуралдаанаас Т.Бадамжунай, Э.Жаргалсайхан, Д.Баярсайхан, Д.Бямба-Очир нарт холбогдох хэргийг хяналтын шатны шүүх хуралдаанаар хэлэлцүүлэхээс татгалзаж шийдвэрлэжээ. Ингэснээр хэрэгт нэмэлт мөрдөн шалгах ажиллагаа хийлгэхээр прокурорт буцаасан анхан болон давж заалдах шатны шүүхийн шийдвэр хэвээр үлдэж байна.
Т.Бадамжунай нь эрх мэдэл, албан тушаалын байдлаа урвуулан ашиглах, хахууль өгөх, мөнгө угаах гэмт хэрэгт, Э.Жаргалсайхан мөнгө угаах, Д.Баярсайхан, Д.Бямба-Очир нар нь эрх мэдэл, албан тушаалын байдлаа урвуулан ашиглах тус тус холбогдсон юм.
Сүхбаатар дүүргийн Эрүүгийн хэргийн анхан шатны шүүхийн шүүгчийн захирамжаар “хэргийг буруу тусгаарласан”, “шүүх хуралдаанаар нөхөн гүйцэтгэх боломжгүй мөрдөн шалгах ажиллагааг хийлгэх” гэсэн үндэслэлүүдээр хэрэгт нэмэлт мөрдөн шалгах ажиллагаа хийлгэхээр прокурорт буцааж шийдвэрлэсэн.
Нийслэлийн Эрүүгийн хэргийн давж заалдах шатны шүүх прокурорын эсэргүүцлийн дагуу хэргийг хянан хэлэлцээд анхан шатны шүүхийн Т.Бадамжунай, Ц.Анандбазар нарын үйлдлийг нэгтгэн шийдвэрлэх талаар заасан хэсэг болон шүүгчийн захирамжид заагдсан ажиллагаануудаас заримыг нөхөн гүйцэтгэх шаардлагатай гэж үзэж, шүүгчийн захирамжийг хэвээр үлдээсэн. Мөн Т.Бадамжунайд холбогдох хэрэгт “хахууль авах” гэмт хэргийн шинж байгааг шалгах шаардлагатай гэж үзсэн юм.
Сэтгэгдэл (0)
Сэтгэгдэл бичигдээгүй байна