“Оюутолгой” ХХК-ийн ажилтнуудын төлөөлөл Өмнөговь аймгаас ирж, цалин хөлсийг бууруулж, эрх ашгийг нь зөрчиж байгаа талаар мэдээлэл хийлээ.
Нэмэгдэл, бонус, урамшуулал зэргийг хасаад зөвхөн үндсэн цалинг өгөх болсон нь хөдөлмөрийн гэрээний гол нөхцөлийг зөрчиж байна гэж тэд ярив. Тус компани ажилтнуудынхаа цалинг хасах шийдвэрийг 2024 оны хоёрдугаар сарын 7-нд гаргасан ч Үйлдвэрчний эвлэл нь энэ тал дээр ажиллаагүй байна. Иймээс өөрсдийн эрхээ хамгаалахын тулд мэдээлэл хийхээр болжээ.
Цалинг 25-30 орчим хувиар, дундаж цалин авдаг ажилтнуудын шөнийн ээлжийн нэмэгдэл, ээлжийн амралтын олговор, шагнал урамшууллыг хасахаар болсон. Бидний асуудлыг хурдан хугацаанд шийдсэн бол мэдээлэл хийх хэмжээнд хүрэхгүй байлаа гэж ажилтнууд онцолж байв.
Компанийн зүгээс 25 хувиар буурна гэж байгаа ч ажилчид өөрсдөө тооцоолоод 50-60 хувь буурна гэж үзэж байгаа юм байна. Энэ талаар ямар нэгэн байдлаар тайлбарлаж, тодорхой мэдээлэл өгөөгүй. Тиймээс хуульд заасан гэрээний дагуу цалин хөлсөө авах шаардлагыг хүргүүлж хэвлэлийн бага хурлыг хийж буйгаа тэд мэдэгдлээ.
Ихээхэн хэмжээний ашигтай ажилласан атлаа “Оюутолгой” ХК ажилтнуудынхаа нөхцөл байдлыг дордуулж, цалин хөлсийг нь бууруулсан гэж тэд үзэж байна.
Сэтгэгдэл (0)
Сэтгэгдэл бичигдээгүй байна