Д.БАЯСГАЛАН: Б.ЭНХБАЯРЫГ ОГТ ТАНИХГҮЙ, АМЬДРАЛДАА УУЛЗАЖ БАЙГААГҮЙ, МӨНГӨ ӨГӨӨГҮЙ

“Бодь” группийн Төлөөлөн удирдах зөвлөлийн дарга Д.Баясгалан “Eagle” телевиз болон Graрh.mn сайтын сэтгүүлчдэд өнөөдөр /2026.03.24/ ярилцлага өгөв.

Тэрбээр "Төмөр замыг 2013 онд батлагдсан төсөвт өртгөөр нь барьсан, 7 жилийн дараа яг цаг хугацаанд нь хийж дуусгасан. Төсвийг нэг ч төгрөгөөр нэмээгүй. Анхны гэрээ 792 сая ам.доллар байсан. Дараа нь нэмэлт ажил өгсөн, тэр нь 213 сая ам.долларын өртөгтэй байсан. Мөн л хугацаандаа дууссан. Энэ төмөр замыг бид Засгийн газарт нэр хүндтэйгээр, улсын комиссын “онц сайн” дүнтэйгээр хүлээлгэн өгсөн." гэж ярив. 

Нийгэмд хамгийн их дуулиан тариад буй Хууль зүй, дотоод хэргийн сайд Б.Энхбаярт 1.3 сая ам.долларын авлига өгсөн гэх асуудлыг эрс няцаав. 

Д.Баясгалан" Л.Оюун-Эрдэнэ Ерөнхий сайд үүнийгээ өөрөө нотлох хэрэгтэй. Би Б.Энхбаяр гэдэг хүнийг огт танихгүй, амьдралдаа уулзаж үзээгүй. Ямар нэгэн хүнээр дамжуулж тэр хүнтэй огт харьцаж үзээ ч үгүй, тийм бодол ч байгаагүй. 2022 онд билүү дээ, Нүүрсний сонсгол хийсэн. Нүүрсний сонсгол дээр оч гэсэн газар нь очсон, асуусан бүх асуултад нь хариулсан. Тэр сонсгол бүтэн өдөр үргэлжилсэн, бичлэг нь ч одоо байгаа байх. Сонсголоос ч өмнө, дараа нь ч тэр ер нь би тэр Б.Энхбаяр гэж хүнтэй хэзээ ч уулзаж байгаагүйгээ дахин хэлмээр байна. Тэгэхээр тийм юм огт болоогүй. Харин тэр Энхбаяр чинь над руу их дайрдаг хүн ш дээ. Янз янзын юм яриад л байдаг. Би яахав дээ ярьж  л байг, улс төр юм чинь гээд тоодог ч үгүй." гэв. Мөн АТГ-т энэ асуудлаар мэдүүлэг өгөх эсэх талаарх асуултад "Би ямар ч асуудалгүй. Гэрчийн мэдээлэл өгөхөд асуудал алга. Харамсалтай нь Монгол Улсын хуулиар хүн гүтгэх чинь хэрэг биш болоод хэнийг ч юу ч гэж гүтгэж болохоор болсон юм байна. Тэрийг сая л мэдэж авлаа." гэсэн юм. 

Мөн Хууль зүй, дотоод хэргийн дэд сайд Д.Мөнх-Эрдэнийг Бодь компанид огт ажиллаж байгаагүй. 11 тэрбум төгрөгийн гэрээ байгуулсан гэсэн байна лээ, тийм юм байхгүй. Тэрийгээ батлаадах гэв. 

Түүнчлэн 110 сая доллар бэлнээр гаргаад улстөрчдийг тарааж авлигадсан гэдэг асуудал дээр "Тийм их доллар аваад явж байдаг ч гэж юу байх вэ. Энэ төсөлтэй холбогдсон бүх орлого, зарлага мөнгөний зөрүүгүй таарч байгаа. Их хэл амтай төсөл учир бид маш их цэгцтэй хандсан. Олон улсын аудитаар аудит хийгдээд, ер нь  үзээгүй газар байхгүй. Л.Оюун-Эрдэнийн ярьж буй зүйл ор үндэсгүй, тэгээд ч боломжгүй зүйл." гэж ярьсан юм.