Монголын Өмгөөлөгчдийн Холбооны Ерөнхийлөгч Л.Данзанноров харилцаа, бүртгэл мэдээллийн цахим системийг боловсронгуй болгох, цахимжуулах, аюулгүй байдлыг хангах, үйлчилгээний хүртээмжийг сайжруулах хүрээнд өмгөөлөгчийн үнэмлэхийг төрийн цахим үйлчилгээний E-Mongolia системд нэвтрүүлэх зорилгоор Төрийн цахим үйлчилгээний зохицуулалтын газрын Салбар дундын зохицуулалт, дахин загварчлалын газрын дарга Б.Дөлгөөн тэргүүтэй төлөөлөгчидтэй өчигдөр (2026.01.21) уулзжээ.
Уулзалтаар өмгөөлөгчийн үнэмлэхийг төрийн үйлчилгээний цахим системд нэвтрүүлэх хэрэгцээ шаардлага, гарах эерэг үр дагавар, E-Mongolia платформд үнэмлэх нэвтрүүлэхэд шаардлагатай үйл явц болон бусад хамтын ажиллагааны боломжийн талаар харилцан мэдээлэл солилцож, нэгдсэн ойлголтод хүрсэн байна.
Төрийн цахим шилжилтийг хэрэгжүүлэх зорилго, чиг үүрэг бүхий газрын төлөөллийн зүгээс Монголын Өмгөөлөгчдийн Холбооны энэхүү санаачилга, хүсэлтийг дэмжиж, шуурхай шийдвэрлэхэд анхаарч хамтран ажиллахаа илэрхийлжээ.
Уулзалтад Монголын Өмгөөлөгчдийн Холбооны харилцаа, бүртгэл мэдээллийн цахим системийг боловсронгуй болгох үүрэг бүхий шинэчлэн байгуулсан ажлын хэсэг оролцсон байна. Уг ажлын хэсгийн ахлагчаар Холбооны гишүүн, өмгөөлөгч У.Болдхүү, гишүүдээр Нийслэлийн Өмгөөлөгчдийн зөвлөлийн дарга Б.Солонго, Удирдах зөвлөлийн гишүүн М.Хандармаа, Холбооны гишүүн, өмгөөлөгч Ц.Одмаа, Б.Агар-Эрдэнэ, Ажлын албаны дарга Г.Дэлгэрцэцэг, Нарийн бичгийн даргаар Сургалт, шалгалт хариуцсан мэргэжилтэн Б.Цэрэнпагма нар томилогдон ажиллаж байгаа аж.
Өмгөөлөгчдийн үнэмлэхийг цахим системд нэвтрүүлснээр:
1.Шүүх эрх мэдлийн болон хууль сахиулах байгууллагууд өмгөөлөгчдийн мэдээллийг шалгах үйл явцыг шуурхай, найдвартай болгох бөгөөд өмгөөллийн үйл ажиллагаа эрхлэх эрх хүчинтэй, түдгэлзүүлсэн эсэхийг харах боломж бүрдэх;
2. Иргэд эрх зүйн туслалцаа авахдаа тухайн өмгөөлөгчийн өмгөөллийн үйл ажиллагаа эрхлэх эрх хүчинтэй эсэхийг албан ёсны эх сурвалжаас шалгах боломжтой болох;
3. Өмгөөлөгчдийн нэгдсэн бүртгэлийн санг цахимжуулах, аюулгүй байдлыг хангах, үйлчилгээний хүртээмжийг сайжруулах, мэргэжлийн холбооны дотоод сонгуулийг зохион байгуулах үйл явцыг хялбарчлах зэрэг чухал ач холбогдолтой юм.
Сэтгэгдэл (0)
Сэтгэгдэл бичигдээгүй байна